H.Fidan İrana qarşı törədilən hücumlarla əlaqədar intensiv diplomatik görüşlər keçirib

Türkiyənin xarici işlər naziri Hakan Fidan son üç gün ərzində ABŞ və İsrailin İrana qarşı hücumları və Tehran rəhbərliyinin cavab tədbirləri fonunda intensiv diplomatik təmaslar həyata keçirir. Bu barədə Türkiyənin Xarici İşlər Nazirliyi məlumat verib.

Nazir H.Fidan fevralın 28-də ABŞ və İsrailin İrana qarşı birgə hücumlarından sonra vəziyyəti qiymətləndirmək və hücumların dayandırılması üçün atıla biləcək addımları müzakirə etmək məqsədilə İran, İraq, Səudiyyə Ərəbistanı, Qətər, Suriya, Misir və İndoneziyanın xarici işlər nazirləri ilə danışıqlar aparıb.

Həmin gün H.Fidan regional hücumları müzakirə etmək üçün Birləşmiş Ərəb Əmirlikləri, İspaniya və Macarıstandan olan həmkarları ilə ayrı-ayrılıqda telefon əlaqəsi saxlayıb.

Hakan Fidan Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas ilə də danışıb. O, bölgədə gərginliyin artması prosesini qiymətləndirib və tərəflərlə qarşıdurmanın dayandırılmasına yönəlmiş diplomatik təşəbbüsləri müzakirə edib.

H.Fidan martın 1-də İranın xarici işlər naziri Abbas Əraqçi ilə İrandakı son vəziyyət barədə fikir mübadiləsi aparıb. Eyni zamanda, regional böhranın həlli səyləri çərçivəsində Oman xarici işlər naziri Seyyid Bədr Həməd Əl-Busaidi ilə də görüşüb.

Xarici işlər naziri H.Fidan martın 2-də Azərbaycan Respublikasının xarici işlər naziri Ceyhun Bayramov ilə telefon danışığı apararaq bölgədəki qarşıdurmanın dayandırılması istiqamətində səyləri müzakirə edib. O, həmçinin Bolqarıstanın xarici işlər naziri Nadejda Neynski ilə görüşərək regional qarşıdurmaların qarşılıqlı təsirlərini qiymətləndirib.

Nazir H.Fidan daha sonra Fransanın xarici işlər naziri Jan-Noel Barro ilə danışığında bölgədəki son inkişafları ətraflı müzakirə edib. Tərəflər gərginliyin azaldılması və hücumların dayandırılması üçün atılacaq konkret addımlar barədə fikir mübadiləsi aparıblar.

H.Fidan İordaniyanın xarici işlər naziri Ayman Səfadi ilə də telefon danışığı aparıb. Danışıqlar zamanı hücumların dayandırılması, gərginliyin azaldılması və əlaqədar tərəflərlə diplomatik səylərin gücləndirilməsi məsələləri diqqət mərkəzində olub. Həmçinin bölgədəki son hadisələrin siyasi, təhlükəsizlik və humanitar aspektləri müzakirə edilib.