Dekabrın 5-də gecə saatlarında Pakistan və Əfqanıstan rəsmiləri sərhəd xəttində ağır silahlı toqquşma baş verdiyini bildirib. Hadisə nəticəsində beş nəfərin həlak olduğu açıqlanıb.

“Taliban” hökumətinin sözçüsü Zabihullah Mücahid Pakistan qüvvələrinin Kandahar vilayətinin Spin Boldak bölgəsinə hücumlar təşkil etdiyini bildirib. Onun müavini Hamdullah Fitri “Reuters” agentliyinə açıqlamasında qeyd edib ki, Pakistan tərəfindən həyata keçirilən bombardman nəticəsində biri “Taliban” üzvü olmaqla beş nəfər ölüb.

Pakistan Baş nazirinin nümayəndəsi isə Əfqanıstan qüvvələri tərəfindən Çaman sərhədində əsassız yerə atəş açıldığını qeyd edib. Pakistan hökumətinin sözçüsü Müşərrəf Zeydi bəyanatında bildirib:

“Pakistan tam hazırlıqlıdır və ölkənin ərazi bütövlüyü ilə vətəndaşların təhlükəsizliyini qorumaqda qərarlıdır”.

Nəticəsiz görüşlər

Qeyd edək ki, bu silahlı insident Cənubi Asiyada yerləşən iki qonşu arasında yeni raund sülh danışıqlarının irəliləyiş olmadan başa çatmasından təxminən bir həftə sonra baş verib. Baş verən hadisədən sonra tərəflər həssas atəşkəsin qorunması barədə razılıq əldə ediblər.

Ötən həftə sonu Səudiyyə Ərəbistanında keçirilən danışıqlar, oktyabrda ölümcül sərhəd toqquşmalarından sonra gərginliyi azaltmaq məqsədilə Qətər, Türkiyə və Səudiyyə Ərəbistanının vasitəçiliyi ilə təşkil edilən bir sıra görüşlərin sonuncusu olub.

Rəsmi İslamabad bildirir ki, mübahisənin mərkəzində son vaxtlar Pakistanda Əfqanıstan vətəndaşlarının da iştirak etdiyi intihar hücumları daxil olmaqla “Təhriki-Taliban Pakistan” (TTP) terror qruplaşmasının həyata keçirdiyi silsilə hücumlar dayanır. Kabil rəhbərliyi isə bu iddiaları rədd edir və Pakistanın öz sərhədləri daxilində təhlükəsizliyə cavabdeh olduğunu vurğulayır.

Xatırladaq ki, oktyabr ayında tərəflər arasında baş verən toqquşmalarda onlarla insan həlak olmuşdu. Bu hadisə “Talibanın” 2021-ci ildə Əfqanıstanda hakimiyyətə qayıtmasından bəri sərhəddə qeydə alınan ən ağır qarşıdurma kimi qiymətləndirilir.