İsrail mediasının yaydığı məlumata görə, ABŞ yaxın həftələrdə İsrailə əlavə hərbçi və hərbi təyyarələr yerləşdirməyə hazırlaşır.

İsrailin "Walla" xəbər saytının təhlükəsizlik mənbələrinə istinadən verdiyi xəbərə görə, hazırda İsrail miqyasında təxminən 3 000 ABŞ hərbçisi vəzifəsini icra edir.

Son həftələrdə növbəti hərbi hissələrin rotasiyası həyata keçirilsə də, müdafiə rəsmiləri mövcud imkanları gücləndirmək məqsədilə qısa müddət ərzində bölgəye yeni şəxsi heyətin və qırıcı təyyarələrin gələcəyini təsdiqləyiblər.

İsrailin yüksək rütbəli təhlükəsizlik rəsmisi "Walla" saytına verdiyi açıqlamada regional düşmənlərin İsrail və ABŞ-dəki seçkiləri yaxından izlədiyini, irimiqyaslı bir müharibəyə səbəb olmadan regional balansı pozmağın yollarını axtardığını bildirib.

CENTCOM koordinasiyası

İsrail Müdafiə Qüvvələri ilə ABŞ Mərkəzi Komandanlığı (CENTCOM) arasındakı operativ planlaşdırma işləri, yenidən ballistik raketlərin atılma ehtimalına qarşı, İran daxilindəki hədəflərə yönəlmiş mümkün cavab zərbələri üzərində cəmləşməyə davam edir.

Xatırladaq ki, rəsmi Tehran sentyabr ayının sonlarında Hörmüz boğazının yenidən açılması üçün Qətər vasitəsilə yeddi şərt irəli sürmüş, lakin ABŞ Prezidenti Donald Tramp bu şərtləri rədd etmişdi.

İsrailin təhlükəsizlik rəsmiləri Yəməndəki husilərə qarşı aparılan mübarizənin Körfəzdəki təhlükəsizlik tərəfdaşlıqlarını yenidən formalaşdıra biləcəyini düşünürlər. Onlar həmçinin Səudiyyə Ərəbistanı ilə Birləşmiş Ərəb Əmirlikləri arasındakı əməkdaşlığın artmasına diqqət çəkirlər.

Husilərin Əl-Xudeydə və Taiz bölgələrində irəliləməsi, xüsusilə Muxa şəhərini və Babülməndəb boğazına nəzarət edən strateji mövqedəki Mayun adasını ələ keçirmələri Yəməndəki qarşıdurmaları yenidən alovlandırıb.