Çin dövlət mediasının yaydığı məlumata görə, ölkənin daxili hissəsində yerləşən fişəng zavodunda baş verən güclü partlayış nəticəsində azı 21 nəfər həlak olub, 61 nəfər isə yaralanıb. Çinin rəsmi "Sinxua" agentliyi hadisənin bazar ertəsi günü Hunan əyalətinin Çanşa şəhərində qeydə alındığını bildirib. Hadisə yerinə 500-ə yaxın xilasedici cəlb olunub, yüksək riskli ərazilərdə təxliyə işləri həyata keçirilib. Hazırda səlahiyyətli orqanlar partlayışın başvermə səbəblərini araşdırır.

Prezident Si Cinpin itkin düşənlərin axtarışı və yaralıların xilas edilməsi üçün bütün imkanların səfərbər edilməsini, hadisə ilə bağlı geniş təhqiqat aparılmasını tələb edib. Qeyd edək ki, Çində sənaye təhlükəsizliyi qaydalarına əməl olunmaması səbəbindən xüsusilə fişəng istehsalı sahəsində qəzalar tez-tez baş verir. Ötən il Hunanda bənzər hadisə zamanı 9 nəfər, 2023-cü ildə Tianjin şəhərindəki partlayışlarda isə 3 nəfər həyatını itirib. Cari ilin fevral ayında Hubei və Jiansu əyalətlərindəki fişəng mağazalarında baş verən partlayışlarda isə ümumilikdə 20 nəfər həyatını itirib.