Türkiyə Prezidenti Rəcəb Tayyib Ərdoğan İraq Kürd Regional İdarəsinin (İKBY) rəhbəri Neçirvan Bərzani ilə telefon danışığı apararaq regiondakı son vəziyyəti müzakirə edib. Bu barədə Türkiyə Respublikası Prezident Administrasiyasının İctimaiyyətlə Əlaqələr İdarəsi “NSosial” platforması üzərindən məlumat yayıb.
Bildirilir ki, ölkə başçısı R.T.Ərdoğan telefon danışığı zamanı Türkiyənin regionu uzunmüddətli fəlakətə sürükləyə biləcək təşəbbüslərə qarşı səylərini davam etdirəcəyini qeyd edib. O, həmçinin terror təşkilatlarının və onlarla əlaqəli qrupların son dövrlərdəki fəaliyyətlərinin diqqətlə izlənildiyini də bildirib.
“Türkiyə bu kritik prosesdə İraqın yanında yer alır”, - deyə dövlət rəhbəri R.T.Ərdoğan vurğulayıb.
Prezident R.T.Ərdoğan əlavə edib ki, Türkiyə regional münaqişələrin sona çatdırılması və danışıqlar prosesinə qayıdışın təmin olunması üçün intensiv şəkildə çalışır.
R.T.Ərdoğan və N.Bərzani telefon danışığı zamanı “Terrorsuz Türkiyə” təşəbbüsünün əhəmiyyətini də vurğulayıblar.
Xatırladaq ki, Prezident R.T.Ərdoğan daha əvvəl İstanbulda keçirilən Türk Dövlətləri Təşkilatının qeyri-rəsmi toplantısı çərçivəsində Türk Şurasının xarici işlər nazirlərini qəbul etmişdi.
