Rusiya Ukraynanın şərqindəki Pokrovsk şəhərini və şimal-şərqindəki Vovçansk şəhərini ələ keçirdiyini açıqlayıb. Bu barədə Kremlin dekabrın 1-də rəsmi “Telegram” kanalında yaydığı bəyanatda bildirilib.

Rusiya xəbər agentliklərinin məlumatına görə, Prezident Vladimir Putin Ukraynadakı əməliyyatın kritik nöqtəsi olan Pokrovskın ələ keçirilməsinin ordunun məqsədlərinə çatmasına imkan verəcəyini bildirib.

V.Putin deyib: “Bu, çox vacib bir xəttdir. Hamımız bunun nə qədər vacib olduğunu bilirik. Bu inkişaf xüsusi hərbi əməliyyatın əvvəlində qoyduğumuz məqsədlərin növbəti mərhələlərdə əldə olunacağını təmin edəcək. Rusiya silahlı qüvvələri əməliyyatın məqsədlərinə çatmağa davam edir. Rusiya qoşunları demək olar ki, bütün istiqamətlərdə irəliləyir’’.

Rusiya lideri Ukraynanın Rusiya ordusunun irəliləməsinə cavab verə bilmədiyini iddia edib və xüsusilə cənubi Zaporojye bölgəsindəki nailiyyətləri vurğulayıb.

Putin döyüşlərdə ağır itkilər verən Ukrayna qoşunlarının vəziyyətini “Ukrayna xalqı üçün faciə” adlandırıb.

Pokrovsk son aylarda Rusiyanın intensiv hücumlarının hədəfinə çevrilib.

Ukrayna ötən ay şəhərə xüsusi təyinatlı qüvvələr də daxil olmaqla, gücləndirmə qüvvələri göndərib, lakin yüzlərlə rus əsgərinin şəhərə daxil olmasının qarşısını ala bilməyib. Xarkov bölgəsindəki Vovçansk isə 2024-cü ilin may ayından bəri şiddətli döyüşlər nəticəsində əsasən dağıdılıb.

Rusiyanın müdafiə naziri Andrey Belousov Vovçanskın ələ keçirilməsini “qələbəyə doğru mühüm addım” kimi təsvir edib.