Türkiyə prezidenti Rəcəb Tayyib Ərdoğan İslam Əməkdaşlıq Təşkilatı üzvləri arasında daha güclü nəqliyyat inteqrasiyasına çağırış edərək, effektiv və etibarlı şəbəkələrin İslam dünyasının iqtisadi potensialını ortaya çıxarmaqda təməl daşı olduğunu söyləyib.
Ərdoğan İstanbulda keçirilən İƏT nəqliyyat nazirləri toplantısına göndərdiyi video müraciətdə müsəlman ölkələrinin Asiyadan Afrikaya, Avropadan Orta Şərqə qədər uzanan geniş bir coğrafiyaya yayıldığını, təbii dəhlizlərə, dinamik gənc əhaliyə və sürətlə böyüyən bazarlara sahib olduğunu qeyd edib.
Lakin bu böyük potensialı tam mənası ilə reallaşdırmaq və coğrafi üstünlükləri strateji gücə çevirmək üçün səmərəli, etibarlı və inteqrasiya olunmuş nəqliyyat şəbəkələrinə ehtiyacımız var deyən Ərdoğan avtomobil yolları, dəmir yolları, limanlar və hava limanları arasındakı əlaqələrin güclənməsinin yalnız ticarəti deyil, həm də üzv dövlətlər arasındakı sosial və mədəni əlaqələri də artıracağını vurğulayıb.
Marmaray, Avrasiya tunelləri və böyük körpülər daxil olmaqla, Türkiyənin son dövrdəki irimiqyaslı infrastruktur layihələrinə diqqət çəkən dövlət başçısı ölkənin qlobal ticarət marşrutlarını gücləndirdiyini və dəmir yolu, dənizçilik və aviasiya imkanlarını genişləndirdiyini bildirdi.
İƏT üzvlərini birləşdirmək üçün yol xəritəsi hazırlandı
Prezident Türkiyənin "Trans-Xəzər Şərq-Qərb Orta Dəhliz Layihəsi"nə verdiyi dəstəklə tarixi İpək Yolunu müasir bir baxışla canlandırdığını söyləyib.
Dövlət başçısı deyib: “Lakin bu investisiyaları yalnız milli çərçivədə qiymətləndirmirik. Hədəfimiz İslam Əməkdaşlıq Təşkilatı üzvləri ilə inteqrasiyanı gücləndirmək, sərhəd-keçid dəhlizləri inkişaf etdirmək və birgə layihələrlə əlavə dəyər yaratmaqdır. Üzv dövlətlər arasındakı nəqliyyat əlaqələrini gücləndirəcək, beynəlxalq platformalarda həmrəyliyi artıracaq və Türkiyənin İƏT dövr sədrliyi çərçivəsində 'Nəqliyyat Əlaqələri Strategiya Sənədi' hazırlayacaq bir yol xəritəsi yaratmaq üçün mühüm qərarlar qəbul etdik. Şübhəsiz ki, bu qərarların effektiv şəkildə tətbiq olunması üçün texniki görüşlərin fasiləsiz keçirilməsi və monitorinq mexanizmlərinin həssas şəkildə işlədilməsi vacibdir. Bu gün nümayiş etdirdiyimiz iradənin buna yol açacağına inanırıq”.
