Türkiyə Prezidenti Rəcəb Tayyib Ərdoğan Prezident İqamətgahında keçirilən Milli Təhlükəsizlik Şurasının iclasına sədrlik edib.

İclasdan sonra yayılan bəyanatda bildirilib ki, İsrail atəşkəsi pozan hücumlarını dərhal dayandırmalı və üzərinə götürdüyü öhdəlikləri yerinə yetirməlidir.

Bəyanatda həmçinin qeyd olunub ki, Türkiyə Qəzzada sabitliyin təmin olunması və yenidənqurma prosesinə töhfə verəcək mexanizmlərin həyata keçirilməsi üçün məsuliyyəti öz üzərinə götürməyə hazırdır.

Oktyabrın 10-da qüvvəyə minmiş atəşkəs razılaşmasına əsasən, Qəzzaya gündə 600 humanitar yardım yük maşınının daxil olması nəzərdə tutulsa da, İsrail maksimum 200 maşının keçidinə icazə verir.

İsrail razılaşmaya əməl etməyib və 10 oktyabrdan bəri demək olar ki, hər gün həyata keçirdiyi hücumlar nəticəsində ən azı 342 fələstinlini qətlə yetirib.

2023-cü ilin oktyabrından etibarən İsrailin Qəzzaya endirdiyi zərbələr nəticəsində isə əksəriyyəti qadın və uşaq olmaqla 70 mindən çox insan həyatını itirib, 170 mindən çox insan yaralanıb.

Milli Təhlükəsizlik Şurası rəsmi Ankaranın Suriya xalqının bütün təbəqələrinin sülh, rifah və təhlükəsizliyi üçün dəstəyini davam etdirəcəyini də bəyan edib.

Şura həmçinin Rusiya–Ukrayna müharibəsindəki son inkişafları müzakirə edərək, Türkiyənin ədalətli və davamlı sülhün təmin olunması istiqamətində qlobal tərəfdaşları ilə səylərini davam etdirməyə sadiq olduğunu bir daha vurğulayıb.