Bir çox ölkə İsrailin iştirakının müsabiqəyə kölgə sala biləcəyini bildirərək 2026-cı il ‘‘Avroviziya’’ mahnı müsabiqəsini boykot edəcəklərini açıqlayıb. İsrailin Qəzzada törətdiyi soyqırım fonunda etirazlar artıb və ölkənin müsabiqədən kənarlaşdırılması üçün çağırışlar edilib. Bu bəyanatlar təşkilatçıların İsrailin iştirakını təsdiqləməsindən sonra səsləndirilib.
Niderland
Niderlandın AVROTROS yayım qurumu ölkənin gələn il keçiriləcək ‘‘Avroviziya’’ mahnı müsabiqəsini boykot edəcəyini açıqlayıb. “Bütün perspektivlər nəzərə alınaraq mövcud şəraitdə müsabiqədə iştirak təşkilatın fundamental ictimai dəyərləri ilə uzlaşmır”,-deyə yayım orqanı vurğulayıb.
İrlandiya
İrlandiya İsrailin müsabiqəyə qatılacağı təqdirdə ‘‘Avroviziya’’da iştirak etməyəcəyini bildirib. İrlandiyanın RTE yayım orqanı Avropa Yayım Birliyi üzvlərinin İsrailin iştirakına dair səsverməni dəstəkləməməsindən sonra 2026-cı ildə keçiriləcək müsabiqədə nə iştirak edəcəyini, nə də onu yayımlayacağını açıqlayıb. RTE bəyan edib ki, Qəzzadakı “dəhşətli insan itkisi və humanitar böhran” fonunda müsabiqədə iştirak “qəbuledilməzdir”.
İspaniya
İspaniyanın ictimai yayımçıları İsrailin müsabiqəyə daxil edilməsinə etiraz olaraq 2026-cı il ‘‘Avroviziya’’ mahnı müsabiqəsinə qatılmayacaqlarını açıqlayıb. RTVE-nin baş katibi Alfonso Morales deyib: “Atəşkəs və sülh prosesinə baxmayaraq Qəzzadakı vəziyyət və İsrailin müsabiqədən siyasi məqsədlər üçün istifadə etməsi ‘‘Avroviziya’’nın neytral mədəni tədbir kimi qalmasını çətinləşdirir”.
Sloveniya
Sloveniyanın milli yayımçısı RTV Sloveniya İsrailin iştirakı ilə bağlı səsvermə çağırışının rədd edildiyini açıqlayıb. Direktorlar Şurasının sədri Nataliya Qorşak deyib: “Mesajımız aydındır: Qəzzada həyatını itirən 20 min uşağın xatirəsinə hörmət olaraq, İsrail iştirak edərsə, biz müsabiqədə iştirak etməyəcəyik’’.
Belçika
Belçikanın VRT yayım orqanı 2026-cı ildə ‘‘Avroviziya’’nı yayımlayacağını açıqlayıb. Fransızdilli yayımçı RTBF-in müsabiqəyə iştirakçı göndərməsi gözlənilir, lakin qurum hələlik öz mövqeyini açıqlamayıb.
İslandiya
İslandiyanın ictimai yayımçısı RUV-in Direktorlar Şurası İsrailin mümkün iştirakı məsələsini müzakirə edəcəklərini bildirib
