Yamayka dövlət rəsmiləri “Melissa” qasırğasından sonra bərpa işləri çərçivəsində bir neçə səyyar xəstəxananın yaradılacağını açıqlayıblar. Bildirilir ki, Karib dənizi hövzəsində təxminən 50 nəfərin həyatını itirdiyi qasırğada həlak olanların sayısının daha da arta biləcəyi gözlənilir.

Adada təsdiqlənmiş ölüm sayı noyabrın 1-i etibarilə 19 olaraq qalır. Lakin səhiyyə naziri Kristofer Tufton keçirdiyi mətbuat konfransında “Bu rəqəmin daha yüksək olduğunu düşünürəm, çünki hələ də çata bilmədiyimiz bölgələr var”, – deyə qeyd edib.

Qeyd edək ki, Haiti Mülki Müdafiə Departamenti qasırğa nəticəsində təxminən 31 nəfərin öldüyünü açıqlayıb.

“Melissa” qasırğası Yamaykanı saatda 185 mil (təxminən 300 kilometr) sürətlə əsən küləklər və güclü leysan yağışlarla vurub. Qasırğanın gücü kateqoriya-5 səviyyəsində ölçülüb.

Ölkənin qərbindəki xəstəxanalar ciddi zərər görüb. Bu səbəbdən hökumət səhiyyə xidmətlərini dəstəkləmək məqsədilə yaxın günlərdə bir neçə səyyar xəstəxana qurmağa qərar verib. Bu xəstəxanalardan birincisi ən çox zərər çəkmiş bölgənin paytaxtı olan Blek River şəhərində qurulacaq.

Nazir K.Tufton bildirib: “Bu tibb məntəqəsinin sabah çatdırılması gözlənilir və dərhal quraşdırılmasına başlanacaq. Tibb məntəqəsi tam avadanlıqlarla təmin ediləcək – əməliyyat otağı, diaqnostika üçün zəruri cihazlar və yerli personalı dəstəkləmək üçün bir neçə beynəlxalq tibb işçisi də daxil olacaq.” Rəsmilərin sözlərinə görə, xəstəxananın gələn həftə ərzində fəaliyyətə başlaması planlaşdırılır.

Səhiyyə naziri K.Tufton həmçinin bildirib ki, Ümumdünya Səhiyyə Təşkilatının, eləcə də İspaniya, Kanada və Hindistanın yardımı ilə əlavə səyyar xəstəxanaların yaradılması nəzərdə tutulur.