Maykl Riqas I İznik Şurasının 1700 illiyi münasibətilə Türkiyəyə səfər edəcək

ABŞ-ın yüksək vəzifəli diplomatı bu həftə Türkiyədə Papa XIV Leonun iştirakı ilə keçiriləcək I İznik Şurasının 1700 illiyi münasibətilə baş tutacaq tədbirlərdə Vaşinqtonu təmsil edəcək.

ABŞ Dövlət Departamentinin noyabrın 25-də yaydığı bəyanatda bildirilib ki, dövlət katibinin administrasiya və resurslar üzrə köməkçisi Maykl Riqas 27 noyabr – 5 dekabr tarixlərində Türkiyə, İraq və Qüdsə səfər edəcək.

Maykl Riqas səfər çərçivəsində ABŞ nümayəndə heyətinə rəhbərlik edəcək və ABŞ–Türkiyə ikitərəfli münasibətlərinin inkişafı məqsədilə türk rəsmiləri ilə görüşlər keçirəcək. Bəyanata görə, o həmçinin İstanbulun Yunan Pravoslav Patriarxı Varfolomeylə də görüşəcək.

Qeyd edək ki, 325-ci ildə Roma imperatoru Konstantin tərəfindən çağırılan I İznik (Nicaea) Şurası erkən xristian aləminin müxtəlif bölgələrindən gəlmiş yepiskopları bir araya gətirərək, xristianlığın əsas doktrinalarının formalaşdırılmasında mühüm rol oynayıb.

Nicaea İstanbul yaxınlığındakı Bursa vilayətində yerləşən İznik qəsəbəsinin qədim adıdır.