Vyetnamın xarici işlər naziri Le Hoai Trunq Qəzzanın yenidən qurulmasına kömək etməyə hazır olduğunu və beynəlxalq hüquq çərçivəsində iki dövlətli həlli dəstəklədiyini bir daha bildirib.

Yerli Vyetnam mediası hökumətin 1967-ci ildən əvvəlki sərhədlərə əsaslanan müstəqil Fələstin dövlətinin yaradılmasını da əhatə edən iki dövlətli həlli dəstəklədiyini bir daha vurğulayıb.

İngilisdilli xəbər saytı "Voice of Vietnam" yaydığı xəbərdə bildirib ki, bu açıqlamanı Vyetnamın baş diplomatı Le Hoai Trunq noyabrın 26-da ilk xarici səfəri üçün Hanoya gələn fələstinli həmkarı Varsen Ağabekyan Şahin ilə görüşündə verib.

Trunq bildirib ki, Vyetnam müharibə nəticəsində viran qalmış Qəzzanın yenidən qurulmasında iştirak etməyə hazırdır.

Trunq Vyetnamın beynəlxalq hüquqa və müvafiq BMT qətnamələrinə əsaslanaraq 1967-ci ildən əvvəlki sərhədlərinə əsaslanan və paytaxtı Şərqi Qüds olan müstəqil Fələstin dövlətinin yaradılmasını əhatə edən iki dövlətli həlli dəstəklədiyini vurğulayıb.

Vyetnamın xarici işlər naziri bildirib ki, Vyetnam həmişə Fələstin xalqının müstəqillik və öz müqəddəratını təyin etmək uğrunda ədalətli mübarizəsini ardıcıl olaraq dəstəkləyib.

Varsen Ağabekyan Şahin Fələstin xalqının “ədalətli” mübarizəsinə “dəyərli” dəstəyinə görə Hanoya təşəkkür edib.

Şahin Vyetnam və Fələstinin milli müstəqillik üçün eyni istəyi bölüşdüyünü vurğulayıb və Vyetnamın gələcəkdə də Fələstini dəstəkləməyə davam edəcəyinə və münaqişənin sona çatmasına töhfə verəcəyinə ümid etdiyini bildirib.

İki nazir həmçinin Vyetnam və Fələstin arasında əməkdaşlığın təşviqi üçün konkret tədbirlər, o cümlədən yüksək səviyyəli nümayəndə heyətlərinin qarşılıqlı səfərlərinin artırılması, iqtisadi əməkdaşlığın yaxşılaşdırılması, təhsil və təlim sahəsində əməkdaşlığın genişləndirilməsi, eləcə də xalqlar arasında münasibətlər barədə razılığa gəliblər.

Trunq və Şahin həmçinin hər iki ölkənin diplomatik pasport sahibləri üçün viza güzəştləri haqqında saziş imzalayıblar.