Rusiya və Ukrayna arasında Pasxa bayramı münasibətilə əldə olunmuş müvəqqəti atəşkəs rejiminin başa çatması ilə cəbhədə qarşılıqlı PUA hücumlarının yenidən başladığı bildirilir. Ukrayna Hərbi Hava Qüvvələrinin məlumatına görə, Rusiya tərəfi 98 pilotsuz uçuş aparatı (PUA) ilə hücum təşkil edib, onlardan 87-si hava hücumundan müdafiə sistemləri tərəfindən zərərsizləşdirilib. Ukrayna rəsmiləri Dnepropetrovsk vilayətindəki infrastruktur obyektlərindən birinə zərbə endirildiyini, itkilərlə bağlı məlumatların dəqiqləşdirildiyini bəyan ediblər. Rusiya Müdafiə Nazirliyi isə öz növbəsində aprelin 13-də Ukraynaya məxsus 33 pilotsuz uçuş aparatının məhv edildiyini açıqlayıb.

Rəsmi Moskva və Kiyev ötən həftənin şənbə günü saat 16:00-dan bazar gününün sonunadək atəşkəsə riayət olunması barədə razılığa gəlmişdilər. Lakin ötənilki təcrübədə olduğu kimi, 1200 kilometrlik cəbhə xətti boyunca yalnız nisbi sakitlik müşahidə edilib. Ukrayna ordusu atəşkəs dövründə Rusiya tərəfindən əksəriyyəti cəbhə xəttində olmaqla 10 mindən çox pozuntu qeydə alındığını bildirsə də, yaşayış məntəqələrinə raket və ya "Şahid/Gerbera" tipli PUA zərbələrinin endirilmədiyini qeyd edib.

Rusiya tərəfi isə Kiyevi atəşkəs rejimini təxminən 2000 dəfə pozmaqda ittiham edib.