Kambocanın informasiya naziri iyul ayında ölümcül sərhəd toqquşmaları zamanı saxlanılan əsgərlərin iki ölkə arasında üç gündən çox davam edən atəşkəsdən sonra azad edildiyini təsdiqləyib.
Kamboca həftələrlə davam edən ölümcül sərhəd toqquşmalarından sonra üç gündən artıq qüvvədə olan yeni atəşkəsin ardından bu gün (31 dekabr) Tailandın iyul ayında ələ keçirdiyi 18 kambocalı əsgəri azad etdiyini təsdiqləyib.
Əsgərlərin azad edilərək yenidən Kamboca ərazisinə daxil olub-olmadığı ilə bağlı suala cavab olaraq, informasiya naziri Neth Pheaktra AFP-yə “Bəli, bunu təsdiqləyə bilərəm”,-deyə bildirib.
Cənub-Şərqi Asiyanın qonşu ölkələri dekabrın 27-də günorta saatlarında (GMT 05:00) qüvvəyə minən atəşkəsi qəbul edərək 20 gün davam edən döyüşlərə son qoyublar. Döyüş təyyarələrinin iştirak etdiyi, qarşılıqlı raket zərbələri və artilleriya atəşləri ilə müşayiət olunan toqquşmalar nəticəsində azı 101 nəfər həyatını itirib, hər iki tərəfdən yarım milyondan çox insan yerindən didərgin düşüb.
İyul ayında əvvəlki toqquşmaları dayandırmaq məqsədilə ABŞ prezidenti Donald Tramp və Malayziyanın Baş naziri Ənvər İbrahimin vasitəçiliyi ilə əldə olunan atəşkəs razılaşmasının uğursuzluğa düçar olmasından sonra sərhəd toqquşmaları bu ayın əvvəlində yenidən alovlanıb.
Hər iki ölkənin müdafiə nazirləri tərəfindən dekabrın 27-də imzalanan razılaşmaya əsasən, Tailand atəşkəsin qüvvəyə minməsindən 72 saat sonra iyul ayından bəri saxlanılan 18 kambocalı əsgəri azad edəcəyini bəyan edib.
Tailandın xarici işlər naziri Sihasak Phuangketkeov atəşkəsin kövrək olduğunu və onun davamlılığının təmin edilməsi ilə yanaşı ikitərəfli münasibətlərin mərhələli şəkildə bərpa edilməsinin vacibliyini vurğulayıb. O, jurnalistlərə açıqlamasında deyib: “Atəşkəs çox yeni qərardır, buna görə də kövrəkdir. Təxribatçı davranışlardan və ya atəşkəsi zəiflədə biləcək addımlardan çəkinməliyik”.
Dekabrın 29-da Tailand ordusu Kambocanın Tailand hava məkanında 250-dən çox pilotsuz uçuş aparatı (PUA) uçurmaqla atəşkəsi pozduğunu iddia edərək, saxlanılan kambocalı əsgərlərin təhvil verilməsi qərarını yenidən nəzərdən keçirə biləcəyi ilə hədələyib.
Kamboca rəsmiləri bu ittihamları qətiyyətlə rədd edərək, ölkə üzrə PUA-ların istifadəsini qadağan edən bir qərar yayımlayıblar.
Tailand Xarici İşlər Nazirliyi isə dekabrın 29-da sərhəd bölgəsində minanın partlaması nəticəsində bir taylandlı əsgərin əzasını itirməsindən sonra Kambocaya rəsmi etiraz notası göndərib.
Mina hadisələri yenidən alovlanan toqquşmaların əsas səbəblərindən biri olub.
Çinin xarici işlər naziri tailandlı və kambocalı həmkarları ilə iki günlük görüşlərə ev sahibliyi edərkən, dekabrın 29-da tərəflərin qarşılıqlı etimadı yenidən qurmaq və atəşkəsi mərhələli şəkildə möhkəmləndirmək üçün birgə fəaliyyət göstərəcəklərini nəzərdə tutan razılaşma əldə olunub.
