ABŞ nümayəndələri Rusiya və Ukrayna rəsmiləri ilə təcili görüşlər keçirərkən, Rusiya Xarici İşlər Nazirliyinin sözçüsü Mariya Zaxarova Avropanın dezinformasiya kampaniyasına başladığını iddia edib.
Rusiya Xarici İşlər Nazirliyi Avropa siyasətçilərini və mediasını ABŞ-ın rəhbərlik etdiyi Ukrayna sülh səylərini pozmağa çalışmaqda günahlandırıb.
Mətbuat katibi Mariya Zaxarova noyabrın 25-də "Sputnik" radiosuna verdiyi açıqlamada Avropanın təkrarlanan "informasiya hücumlarının" münaqişənin "siyasi və diplomatik həlli ehtimalını" pozmağa yönəldiyini söyləyib.
Noyabrın 24-də ABŞ ordusunun katibi Den Driskol Əbu-Dabidə Rusiya rəsmiləri ilə yeni danışıqlar raunduna rəhbərlik edib.
Driskol həmçinin davam edən döyüşlərə son qoyacaq mümkün sülh razılaşmasını müzakirə etmək üçün Ukrayna hərbi kəşfiyyatının rəhbəri Kirilo Budanovla da görüşüb.
Danışıqlar ABŞ və Ukrayna nümayəndələri prezident Donald Trampın mübahisəli 28 maddəlik sülh planını yenidən nəzərdən keçirdikləri Cenevrədəki həftəsonu danışıqlarından sonda baş tutub.
Əvvəlcə Rusiya üçün əlverişli hesab edilən ilkin versiya Ukraynanın əsas narahatlıqlarını həll edən daha balanslı bir təkliflə əvəz edilib.
Prezident Tramp "Truth Social"da paylaşım edərək deyib: "Sülh planını yekunlaşdırmaq ümidi ilə xüsusi nümayəndəm Stiv Uitkovfa Moskvada prezident Putinlə, ordu katibi Den Driskolla isə ukraynalılarla görüşməyi tapşırmışam". O, həmçinin danışıqların "yalnız bir neçə mübahisəli məqamı" olduğunu qeyd edib.
Ağ Ev "böyük irəliləyiş" əldə edildiyini bildirib, lakin hər hansı sülh razılaşmasının yekunlaşdırılmasından əvvəl həssas detalların həll edilməli olduğu barədə xəbərdarlıq edib.
Lakin Fransa prezidenti Emmanuel Makron şübhə ilə yanaşaraq bildirib ki, Moskvanın yenidən işlənmiş plan çərçivəsində atəşkəsi müzakirə etmək üçün aydın bir niyyəti yoxdur.
