İsrail mediasının yaydığı məlumata görə, rəsmi Təl-Əviv ABŞ-nin vasitəçiliyi ilə Livanla aparılan danışıqlarda razılığın əldə olunması üçün iki həftəlik vaxta ehtiyac duyulduğunu açıqlayıb. İsrail danışıqların uğuqsuzluqla nəticələnəcəyi təqdirdə hərbi gərginliyin yenidər artacağı barədə xəbərdarlıq edib.
Məlumata əsasən, İsrail tərəfi may ayının ortalarına qədər uzadılan mövcud atəşkəs rejimini Livanla əsaslı sazişin imzalanması şərti ilə qəbul edib. KAN xəbər agentliyinə müsahibə verən və adı açıqlanmayan İsrail rəsmisi deyib:"Biz sonsuzadək gözləyə bilmərik, danışıqlara cəmi iki həftə vaxt veririk".
ABŞ administrasiyası yaxın iki həftə ərzində İsrail Baş naziri Benyamin Netanyahu ilə Livan Prezidenti Cozef Aun arasında görüş təşkil etməyə çalışır. Lakin ekspertlər belə bir görüşün baş tutma ehtimalına şübhə ilə yanaşırlar.
Xatırladaq ki, aprelin 17-də elan edilmiş 10 günlük ilkin atəşkəs rejiminin müddəti ötən cümə axşamı daha üç həftə uzadılmışdı.
Livanın rəsmi məlumatlarına görə, martın 2-dən bəri davam edən hücumlar nəticəsində ən azı 2534 nəfər həlak olub, 7863 nəfər yaralanıb, 1,6 milyondan çox insan isə yurd-yuvasından didərgin düşüb.
