Türkiyənin müdafiə sənayesi şirkətləri ölkənin inteqrasiya edilmiş, çoxfunksiyalı və tamamilə yerli “Çelik Kubbe” hava hücumundan müdafiə sistemini gücləndirmək və inkişaf etdirmək məqsədilə 6,5 milyard ABŞ dolları məbləğində müqavilə imzalayıb. Bu barədə məlumatı Türkiyə Müdafiə Sənayesi Rəhbərliyi (SSB) noyabrın 26-da yayıb.

Qeyd edək ki, NATO üzvü olan Türkiyə son illərdə müdafiə sənayesi istehsalını əhəmiyyətli dərəcədə artıraraq xarici təchizatçılardan asılılığını azaldıb. “Çelik Kubbe” sisteminin qurulması planları ilk dəfə 2024-cü ilin iyul ayında açıqlanmışdı.

Layihə müxtəlif mənzillərdə fəaliyyət göstərən radiolokasiya sistemləri, raketlər, elektro-optik sensorlar, komanda və idarəetmə mərkəzləri, eləcə də hava hücumundan müdafiənin digər elementlərini əhatə edən 47 komponentdən ibarətdir.

Tamamilə yerli sistemlər

SSB-nin rəhbəri Haluk Görgün açıqlamasında bildirib ki, müqavilələr ROKETSAN tərəfindən hazırlanacaq döyüş sistemlərini və onların təkmilləşdirilmiş versiyalarını əhatə edir və “Çelik Kubbe” tamamilə yerli sistemlərdən ibarət olacaq.

H.Görgün qeyd edib ki, bu müqavilələr Türkiyənin müdafiə qabiliyyətinin artırılmasına kömək edəcək, eyni zamanda döyüş sistemlərinin mənzilini və fəaliyyət imkanlarını genişləndirmək səylərinə töhfə verəcək.

ASELSAN və ROKETSAN rəhbərləri müqavilələri strateji əhəmiyyətə malik razılaşmalar kimi qiymətləndirərək, onların kosmik və hava hücumundan müdafiə sistemləri, tank əleyhinə sistemlər və digər strateji müdafiə sistemlərini əhatə etdiyini bildiriblər.

H.Görgün əlavə edib ki, Türkiyə bu gün müdafiə sənayesi sahəsində dünyanın aparıcı ixracatçıları arasında yer alır.