Somaliyanın Milli Kəşfiyyat və Təhlükəsizlik Agentliyi (NISA) fevralın 24-də Əl-Şəbab qruplaşmasına qarşı keçirilən əməliyyatlar nəticəsində 23 terrorçunun məhv edildiyini açıqlayıb.

Əməliyyatların beynəlxalq tərəfdaşlarla koordinasiyalı şəkildə Hirşabelle əyalətinin Hiiraan və Mərkəzi Şabelle bölgələrində keçirildiyi bildirilib.

Agentliyin yaydığı məlumatda bildirilir ki, Mahas şəhəri yaxınlığındakı Vab-veyn və Qobo ərazilərində terrorçuların səfərbər olunduğuna dair kəşfiyyat məlumatları alındıqdan sonra qabaqlayıcı zərbələr endirilib. Hücum törətməyə hazırlaşan qruplaşma üzvləri hədəf alınıb, eyni zamanda Hiiraan bölgəsinin Moqokori şəhərində yerləşən terror düşərgəsi də tamamilə məhv edilib.

Qeyd edək ki, Somali hökuməti "Əl-Qaidə" ilə əlaqəsi olan bu terror qruplaşmasını "Xaricit" adlandırır. 16 ildən artıqdır ki, ölkədə sabitliyi pozmağa çalışan qruplaşmaya qarşı mübarizə ötən ilin iyul ayından etibarən daha da gücləndirilib.

Somali ordusunun Afrika Birliyinin Somalidəki Missiyası (AMIS) və digər beynəlxalq tərəfdaşlarla birgə apardığı əməliyyatlar BMT Təhlükəsizlik Şurasının mandatı əsasında cari ilin sonuna qədər davam etdiriləcək.