Ölkə rəsmilərinin mayın 22-də verdiyi açıqlamada yeni inşa edilmiş 5000 tonluq gəminin mayın 21-də keçirilmiş suya buraxılma mərasimi zamanı “ciddi bir qəzanın baş verdiyini” və gəminin alt hissəsini zədələndiyini bildirib. Dövlət rəhbəri Kim Çen In isə bu qəzanı “cinayət xarakterli hərəkət” adlandırıb.
Cənubi Koreya ordusunun ABŞ və Seul kəşfiyyatına istinadən yaydığı məlumata görə, Şimali Koreya gəmini “yan tərəfdən suya endirməyə çalışıb”, lakin bu cəhd uğursuz olub və gəmi suda yan vəziyyətdə qalıb.
Bununla belə, Şimali Koreyanın rəsmi xəbər agentliyi “Korean Central News Agency” (KCNA) cümə günü yaydığı məlumatda “ilk bəyanatdan fərqli olaraq suyun altında və gəminin içində aparılan yoxlamalar zamanı gəminin alt hissəsində heç bir dəlik aşkarlanmadığını” bildirib. “Gəminin sağ tərəfində cızıq izləri yaranıb və xilasetmə kanalından gəminin quyruq hissəsinə müəyyən miqdarda dəniz suyu sızıb”, - agentlik xəbər verib.
Cinayət xarakterli hərəkət
Mayın 22-də Kim Çen Inın də iştirak etdiyi tədbirdə gəminin uğursuz suya buraxılması “komanda heyətinin təcrübəsizlik və səhlənkarlığı” olaraq adlandırılıb. Şimali Koreya rəhbəri Kim Çen In bunu “səhlənkarlıq səbəbində baş vermiş cinayət xarakterli hərəkət” kimi qiymətləndirib.
KCNA mayın 23-də yaydığı məlumatda bildirib ki, qəzanın baş verdiyi Şərq sahilində yerləşən Çxoncin şəhərindəki gəmiqayırma zavodunun müdiri Honq Kil Ho mayın 22-də hüquq-mühafizə orqanları tərəfindən dindirilib.
Ekspertlərin fikrincə, su dolmuş hissədən suyun çıxarılması və gəminin balansının bərpası iki və ya üç gün çəkə bilər. Bundan əlavə, gəminin əvvəlki vəziyyətinə qaytarılmasının təxminən 10 gün çəkəcəyi qeyd olunub.
Cənubi Koreya ordusunun ehtimallarına əsasən, yeni tikilmiş hərbi gəmi Şimali Koreyanın ötən ay təqdim etdiyi 5000 tonluq “Çoe Hyon” adlı esmines sinifli gəmi ilə oxşar avadanlıqlara malikdir.
Qeyd edək ki, Şimali Koreya rəsmiləri “Çoe Hyon” gəmisinin ən güclü silahlarla təchiz edildiyini və gələn ilin əvvəlində istismara veriləcəyini irəli sürüblər.
