Roma Papası XIV Leo Türkiyədə rəsmi səfərdədir.
XIV Leo səfər çərçivəsində Türkiyə Prezidenti Rəcəb Tayyib Ərdoğanla görüşəcək.
Qeyd edək ki, bu, Roma Papasının Türkiyəyə 11 ildən sonra ilk rəsmi səfəridir.
Papanın Türkiyə prezidenti Rəcəb Tayyib Ərdoğanla görüşü, Türkiyənin mühüm şəhərlərini ziyarəti və dini mərasimlərdə iştirak etməsi planlaşdırılır.
Papa qlobal sülhün əhəmiyyətini vurğulayıb və səfərinin dünyaya onun əhəmiyyətini xatırlatacağına ümid etdiyini bildirib.
Papanı hava limanında Türkiyənin mədəniyyət və turizm naziri Mehmet Nuri Ersoy və onu müşayiət edən rəsmilər qarşılayıblar.
Papanı Türkiyəyə səfərində Kardinal Pietro Parolin və Arxiyepiskop Paul Riçard Qallager də daxil olmaqla Vatikan rəsmiləri müşayiət edir.
Papa bu səfərinə görə məmnun olduğunu və Türkiyəyə səfərini bütün xristianlar və dünya üçün əhəmiyyətinə görə səbirsizliklə gözlədiyini bildirdi.
Türkiyə və Livandakı proqramlarından danışan Papa səfərinin dünyada hər kəs üçün sülhün əhəmiyyətini vurğulamağı hədəflədiyini bir daha dilə gətirib.
Vatikan lideri din və inanc fərqlərinə baxmayaraq, bəşəriyyətin daxili birliyini vurğulayıb, bütün insanları sülh naminə birləşməyə çağırıb və sülh və qlobal birlik səylərinə töhfə verməyə ümid etdiyini bildirib.
Papanın səfəri Türkiyə Cümhuriyyətinin banisi Mustafa Kamal Atatürkün dəfn olunduğu Anıtqəbirdə keçiriləcək mərasimlə başlayacaq.
Daha sonra Prezident İqamətgahında Papa üçün rəsmi qarşılanma mərasimi keçiriləcək. Orada Papa Türkiyə Prezidenti ilə Türkiyə-Vatikan münasibətlərini və Fələstindəki vəziyyət də daxil olmaqla digər mövcud regional və qlobal məsələləri müzakirə edəcək.
Həmçinin, Ankaradakı Prezident Milli Kitabxanasının Cihannüma zalında mətbuat konfransı keçiriləcəyi gözlənilir. Bu kitabxana dünyada üçüncü ən böyük kitabxana kimi təsvir olunur.
Noyabrın 28-də Papa İstanbuldakı Saint Esprit Katedralında xristian ruhaniləri ilə görüşəcək, Fransa Yoxsulxana Evini ziyarət edəcək və helikopterlə İznikə uçacaq və orada dini mərasimdə iştirak edəcək.
O, noyabrın 29-da Sultanəhməd Məscidini və Mor Efrem Suriya Pravoslav Kilsəsini ziyarət edəcək və burada Fənər Rum Patriarxı Varfolomey ilə görüşəcək. Son olaraq Volkswagen Arenada mərasim keçiriləcək.
Papanın Türkiyəyə səfəri Erməni Apostol Katedralında son mərasimlə və onun ildönümünü qeyd etmək üçün Fənər Rum Patriarxlığına qayıtmaqla başa çatacaq.
Papa 27-30 noyabr tarixlərində Ankara, İstanbul və İznik şəhərlərinə səfər edəcək.
