Rusiya Federasiyasının prezidenti Vladimir Putin Qırğızıstana işgüzar səfər edib. Rəsmi səfər çərçivəsində Moskva hökuməti ilə Bişkek rəhbərliyi arasında ticarət, iqtisadiyyat, təhsil və miqrasiya sahələrini əhatə edən genişmiqyaslı saziş paketinin imzalanacağı gözlənilir.
Noyabrın 26-da Bişkekdə Qırğızıstan prezidenti Sadır Japarovla keçirdiyi görüşdə V.Putin iki ölkə arasındakı ittifaq və strateji tərəfdaşlığın daha da möhkəmləndirilməsinin prioritetlərini müəyyən edən birgə siyasi bəyanatın imzalanmağa hazır olduğunu bildirib.
“Görüşlərimizin gündəliyi xeyli genişdir”, – deyən V.Putin hökumətlərarası sənədlərin əməkdaşlığın müxtəlif sahələrdə genişləndirilməsinə yönəlmiş əsas hədəfləri əks etdirdiyini vurğulayıb.
Prezidenti V.Putin əlavə edib ki, Rusiya Qırğızıstanla münasibətlərə xüsusi əhəmiyyət verir və ikitərəfli əlaqələr qarşılıqlı hörmət və hər iki tərəfin maraqlarına diqqət yetirilməsi prinsipi əsasında inkişaf etməkdə davam edir.
“Dost ölkə Qırğızıstanda olmaqdan mən və əməkdaşlarım böyük məmnuniyyət hissi keçiririk”, – deyə Rusiya ölkə başçısı bildirib və səfərinin Kollektiv Təhlükəsizlik Müqaviləsi Təşkilatının (KTMT) Kollektiv Təhlükəsizlik Şurasının iclası ərəfəsinə təsadüf etdiyini xatırladıb.
Rəsmi Moskva və Bişkek rəhbərliyi milli valyuta ilə ticarət aparır
V.Putin həmçinin Rusiya və Qırğızıstan arasındakı qarşılıqlı ödənişlərinin təxminən 97 faizini öz milli valyutaları ilə həyata keçirdiyini qeyd edib.
Hər iki ölkənin qarşılıqlı hesablaşmaların tənzimlənməsi üçün yeni mexanizmlər üzərində müvafiq işlərin aparıldığını bildirən V.Putin deyib:
“Rusiya Qırğızıstanın aparıcı ticarət və iqtisadi tərəfdaşıdır. Ötən il ticarət dövriyyəsi 13,6 faiz artaraq 4,1 milyard dollara çatmaqla rekord həddə yüksəlib. Yanvar-sentyabr dövründə isə əlavə olaraq 17 faiz artım müşahidə olunub.”
RF başçısı həmçinin Rusiya investisiyalarının təxminən 2 milyard dollara çatdığını bildirib. Qırğızıstan prezidenti Sadır Japarov isə ölkədə fəaliyyət göstərən Rusiya şirkətlərinin sayının ötən il 1.800-ə yüksəldiyini açıqlayıb.
Xatırladaq ki, prezident V.Putin noyabrın 25-də Qırğızıstanın paytaxtı Bişkekə işgüzar səfər edib. Qırğızıstan Prezident Administrasiyasının açıqlamasında bildirilib ki, tərəflər xüsusilə ticarət və iqtisadi əlaqələrin gücləndirilməsi, investisiya və sənaye əməkdaşlığının genişləndirilməsi, hərbi-texniki və mədəni-humanitar sahələrdə qarşılıqlı əməkdaşlığın artırılması, eləcə də regional təhlükəsizlik məsələlərinin müzakirəsinə xüsusi diqqət yetiriblər.
Qeyd edək ki, V.Putinin səfəri Ermənistan, Belarus, Qazaxıstan, Qırğızıstan, Rusiya və Tacikistandan ibarət Kollektiv Təhlükəsizlik Müqaviləsi Təşkilatının (KTMT) 27 noyabrda Bişkekdə keçiriləcək zirvə toplantısı ilə eyni vaxta təsadüf edir.
