Türkiyə Respublikasının prezidenti Rəcəb Tayyib Ərdoğan Fələstinlilərə humanitar yardım səylərinə və Qəzzadan tibbi təxliyələrin həyata keçirilməsində oynadığı rola görə Ümumdünya Səhiyyə Təşkilatının (ÜST) Avropa Mükafatına layiq görülüb.

Mükafat noyabrın 26-də Ankarada keçirilən 11-ci Türk Tibb Dünyası Qurultayında ÜST-ün Avropa üzrə regional direktoru Hans Kluge tərəfindən təqdim edilib.

Təqdimat mərasimində çıxış edən R.T.Ərdoğan son iki il ərzində Qəzzadakı xəstəxanaların məhv edilməsi, xəstələrin, tibb işçilərinin və körpələrin öldürülməsi qarşısında beynəlxalq ictimaiyyətin göstərdiyi laqeydliyi tənqid edib.

Prezident Rəcəb Tayyib Ərdoğan deyib: “Qəzzada tam iki il boyunca xəstəxanaların bombalanmasına, xəstələrin, tibb işçilərinin, və günahsız körpələrin qətlə yetirilməsinə göz yuman bir dünyadan başqa bir dünyaya keçmək şübhəsiz ki, asan olmayacaq.”

Ölkə rəhbəri R.T.Ərdoğan bildirib ki, insanlıq bir həyatı xilas etməyin sevincini birlikdə yaşadığı, dünyaya sağlam gələn bir körpənin sevincini öz sevinci kimi gördüyü zaman dünya cənnətə çevriləcək.

Dövlət başçısı R.T.Ərdoğan Türkiyənin son 23 ildə səhiyyə sistemini köklü şəkildə yeniləndiyini, bütün əhaliyə yüksək və əlçatan, keyfiyyətli bir xidmət yaradıldığını deyib. Prezident əlavə edib ki, Türkiyə bu gün 86 milyon nəfərə birinci dərəcəli xidmət göstərir və bunu 1 milyon 470 mindən çox tibb işçisinin dəstəyi ilə həyata keçirir.

Yenilikçi səylər

Türkiyə prezidenti R.T.Ərdoğan qeyd edib ki, 2002-ci ildən bəri səhiyyə sektorundakı işçi qüvvəsi 288 faiz artıb, son bir il yarımda isə aralarında 57 mindən çox həkimin olduğu təxminən 100 min yeni əməkdaş işə qəbul olunub.

O bildirib ki, dövlət xəstəxanalarının 80 faizi yenilənib və ya yenidən inşa edilib, tikilən 794 yeni xəstəxana dövlət xəstəxanalarının çarpayı sayını 173 minə çatdırıb. Prezident R.T.Ərdoğanın sözlərinə görə, 2002-ci ildə 7 min olan yüksək keyfiyyətli çarpayı sayı bu gün 122 minə yüksəlib və ümumi çarpayı tutumu 164 mindən 271 minə çatdırılıb.

Prezident həmçinin zəlzələdən zərər görmüş bölgələrdə yenidənqurma prosesinin davam etdiyini qeyd edərək vurğulayıb ki, 5.100-dən artıq çarpayıya malik 109 tibb müəssisənin hazırlıqları tamamlanıb və 11 vilayət üzrə ümumi tutum 23.733-dən 27.503-ə qaldırılıb.

Elmi tədqiqatlar, dərman və tibbi avadanlıq istehsalı sahəsində irəliləyişin vacibliyinə toxunan R.T.Ərdoğan deyib: “Daxildən və xaricdən müxtəlif maneələrlə qarşılaşırıq. Amma necə ki, müdafiə sənayesində çətin oyunları pozduqsa, inşallah yerli dərman və tibbi avadanlıq istehsalında da Allahın izni ilə bu maneələri aşacağıq”.

Dövlət başçısı R.T.Ərdoğan əlavə edib ki, Türkiyə ölkənin səhiyyə hədəflərini irəli daşıyacaq bütün yenilikçi və real səyləri dəstəkləməkdə qərarlıdır.

Məsələylə bağlı Türkiyə Prezidenti Administrasiyasının İctimaiyyətlə Əlaqələr İdarəsinin rəhbəri Burhanəddin Duran Türkiyənin sosial media platforması “NSosyal”da paylaşım edərək deyib: “Bu mükafat eyni zamanda Türkiyənin, cənab Prezidentimizin vizionu istiqamətində inkişaf etdirdiyi humanitar diplomatiya anlayışının təsdiqidir. Qəzzada yaşanan ağır mənzərəyə baxmayaraq humanitar yardımın davam etməsi, tibbi təxliyələrin təhlükəsiz şəkildə həyata keçirilməsi və məzlumların səsinin dünyaya çatdırılması cənab Prezidentimizin şəxsi nəzarəti, iradəsi və liderliyi ilə mümkün olmuşdur. Fələstin məsələsindəki humanitar həssaslığın illərdir ardıcıl şəkildə davam etməsi həm regionda, həm də beynəlxalq platformalarda güclü rezonans doğurur.”