Ankara Cenində Türkiyənin Konsulluq rəsmisi də daxil olmaqla İsrail əsgərlərinin diplomatlara atəş açmasını pisləyib, bunu beynəlxalq hüququn ciddi şəkildə pozulması kimi qiymətləndirib və qlobal qınama tələb edib.

İsrail əsgərlərinin işğal altındakı İordan çayının qərb sahilindəki Cenin şəhərinə səfəri zamanı aralarında türk konsulluğu rəsmisinin də olduğu bir qrup diplomata atəş açması Xarici İşlər Nazirliyi tərəfindən sərt şəkildə pislənilib.

Mayın 21-də yayımlanan və sərt ifadələrin yer aldığı bəyanatda hücum diplomatik təhlükəsizliyə "ciddi təhdid" və İsrailin "beynəlxalq hüquqa və insan haqlarına sistemli etinasızlığının" başqa bir nümunəsi olaraq xarakterizə edilib.

Bəyanatda “Cenin şəhərinə səfəri zamanı Qüds Baş Konsulluğumuzun rəsmisi də daxil olmaqla İsrail əsgərlərinin bir qrup diplomata atəş açmasını ən kəskin şəkildə pisləyirik” deyilib və diplomatların həyatının təhlükə altında olduğu və bunun qəbuledilməz bir hərəkət olduğu vurğulanıb.

Hadisənin dərhal araşdırılmasına çağırış edilib

Nazirlik hadisənin dərhal araşdırılmasını tələb edib və cinayətkarların məsuliyyətə cəlb edilməsinin vacibliyini bildirib. Həmçinin beynəlxalq ictimaiyyət bu hadisəyə qarşı qəti mövqe nümayiş etdirməyə çağırılıb:

“Diplomatların hədəfə alınması təkcə fərdi təhlükəsizliyə deyil, həm də dövlətlər arasında münasibətlərin əsasını təşkil edən hörmət və etimad mühitinə ciddi təhlükə yaradır”.

Türkiyə beynəlxalq aktyorları hücumu “ən sərt şəkildə” pisləməyə və İsrailin işğal olunmuş Fələstin ərazilərində artan “cəzasızlıq zirehinə” qarşı konkret addımlar atmağa çağırıb.

Hadisə ilə bağlı İsrail rəsmilərindən hələlik heç bir açıqlama verilməyib.