Türkiyə Prezidenti Rəcəb Tayyib Ərdoğan İrandan Türkiyə istiqamətində atılan üçüncü raketin NATO tərəfindən zərərsizləşdirilməsindən sonra təxribatlara qarşı xəbərdarlıq edib.
Ölkə rəhbəri R.T.Ərdoğan bildirib ki, genişlənən regional münaqişədən Türkiyəni uzaq saxlamaq hökumətin ən mühüm prioritetidir.
Məsələylə bağlı martın 13-də açıqlama verən Prezident R.T.Ərdoğan deyib: “Ölkəmizi bu od çuxurunun kənarında saxlamaq ən böyük prioritetimizdir.” O, rəsmi Ankaranın Türkiyəni müharibəyə cəlb etməyi hədəfləyən planlar, tələlər və təxribatlar qarşısında son dərəcə diqqətli hərəkət etdiyini vurğulayıb.
Dövlət başçısı R.T.Ərdoğan bildirib ki, Türkiyə öz ərazisini hədəf alan təhdidlərə qarşı zəruri addımlar atıb və hava məkanının müdafiəsini davam etdirəcək.
O qeyd edib ki, Türkiyənin hava məkanını pozan bütün təhdidlərə qarşı lazımi tədbirlər görülüb və dünən gecə də olduğu kimi dərhal hərəkətə keçilib.
Məzhəbi gərginliklə bağlı xəbərdarlıq
Türkiyə Prezidenti R.T.Ərdoğan davam edən böhran fonunda məzhəb və etnik gərginliyi qızışdırmağa yönəlmiş cəhdlərə qarşı vətəndaşları diqqətli olmağa çağırıb. O bildirib ki, belə gərginliklər İrana qarşı hücumlar və regionda ümumi qeyri-sabitlik şəraitində qəsdən təhrik edilə bilər.
“Vətəndaşlarımız məzhəb və etnik gərginliyi təhrik etməyə yönəlmiş cəhdlər qarşısında diqqətli olmalıdır”, – deyə R.T.Ərdoğan vurğulayıb.
Prezident dəyişən geosiyasi mühitin Türkiyədən daha sürətli və daha strateji addımlar atmağı tələb etdiyini də qeyd edib.
“Yeni bir dövrə daxil oluruq. Bu dövrdə daha sürətli hərəkət etməli, daha çevik və daha proaktiv olmalıyıq”, – deyə o bildirib.
“İnsanlığın vicdanı”
Prezident R.T.Ərdoğan həmçinin xüsusilə Qəzza ilə bağlı beynəlxalq ictimaiyyətin seçici reaksiyalarını tənqid edib. O bildirib ki, bəzi ölkələr zülmə və soyqırıma göz yumur, bəziləri isə zorakılığa görə məsuliyyət daşıyan tərəfləri açıq şəkildə dəstəkləyir.
“Virtual dünyanın saxta vicdanı səbəbindən yetim qalan fələstinli və suriyalı uşaqların çəkdiyi əzab tək bir pinqvinin gördüyü diqqəti belə görmür”, – deyə R.T.Ərdoğan qeyd edib.
Prezident əlavə edib ki, vicdan böhranının yaşandığı bir dünyada Türkiyə insanlığın vicdanı olmaq üçün mübarizə aparır.
