Fransa Prezidenti Emmanuel Makron İraqın Ərbil bölgəsində baş verən hücum nəticəsində çavuş Arno Frionun həlak olduğunu təsdiqləyib.

Fransa qüvvələrinə qarşı törədilən bu hücumu "qəbuledilməz" adlandıran Emmanuel Makron həyatını itirən hərbçinin xidmətlərini yüksək qiymətləndirib və Fransanın öz heyətini qorumaq üçün bütün lazımi tədbirləri görəcəyini bildirib.

Rəsmi mənbələrin məlumatına görə, terrorla mübarizə təlimləri zamanı pilotsuz uçuş aparatı (PUA) ilə həyata keçirilən hücum nəticəsində yeddi fransız əsgəri yaralanıb.

İraq Kürd Regional Rəhbərliyinin komandanı Şirvan Bərzani hücumun Məxmur bölgəsindəki müştərək Peşmərgə-Fransa bazasına edildiyini açıqlayıb.

Bərzani vurğulayıb ki, PUA zərbəsi Fransa hərbi məsləhətçilərinin Peşmərgə döyüşçülərinə təlim keçdiyi sahəni hədəf alıb. O, fransız hərbçilərin bölgədə yalnız qanuni məsləhətçi statusunda olduqlarını və birbaşa münaqişələrdə iştirak etmədiklərini xatırladıb.

Hadisəni "ədalətsiz terror aktı" kimi xarakterizə edən Bərzani İraq hökumətini bu növ hücumların qarşısını almağa çağırıb.

Ərbil valisi Omed Xoşnəv isə hücum nəticəsində altı fransız əsgərinin yaralandığını, onlardan dördünün xəstəxanaya yerləşdirildiyini bildirib. Valinin sözlərinə görə, hücum Məxmurdakı "altıncı ox" adlanan mövqeyi hədəf alsa da, Peşmərgə heyəti arasında xəsarət alan olmayıb.