İran Baş Prokurorluğu Vaşinqton və Təl-Əvivin Tehrana qarşı başlatdığı müharibə şəraitində ABŞ və İsraillə əməkdaşlıq etməkdə ittiham olunan İran vətəndaşlarının xaricdəki bütün aktivlərinin müsadirə olunacağını bəyan edib. Baş Prokurorluq bu qərarı oktyabr ayında qüvvəyə minmiş və İsrail, ABŞ, habelə digər düşmən dövlət və ya qruplarla hər hansı formada əməkdaşlıq edən şəxslər üçün "bütün aktivlərin müsadirəsini" və digər ağır hüquqi cəzaları nəzərdə tutan qanuna əsaslandırıb.

"Press TV"-nin yaydığı məlumata görə, müvafiq qanunda düşmən rejimlərin və ya onlarla əlaqəli ünsürlərin adından ölkənin təhlükəsizliyinə qarşı həyata keçirilən hər bir əməliyyatın 21 aprel 2013-cü ildə təsdiq olunmuş İslam Cinayət Məcəlləsinin 19-cu maddəsinin 5-ci qeydinə əsasən cəzalandırılacağı bildirilir. Bu hüquqi akt həmin şəxslərin əmlakının tam müsadirəsi ilə yanaşı, həm də ölüm cəzasını nəzərdə tutur.

İran rəsmi dairələrinin bildirdiyinə görə, 28 fevralda başlayan ABŞ-İsrail birgə hücumları nəticəsində aralarında ali dini lider Əli Xameneinin də olduğu 1200-dən çox insan həyatını itirib, 10 mindən çox şəxs isə yaralanıb.

Tehran bu hücumlara cavab olaraq ABŞ və İsrail hərbi qüvvələrinin Körfəz ölkələrindəki obyektlərinə pilotsuz uçuş aparatları və raketlərlə zərbələr endirib.