Prezident himayəsində keçirilən 7-ci Beynəlxalq Yelkənli Qayıq Yarışlarının ilk mərhələsi olan “Milli Suverenlik Kuboku”na 23 aprel Milli Suverenlik və Uşaq Bayramı münasibətilə İstanbul boğazından start verilib.
Türkiyənin Mədəniyyət və Turizm Nazirliyi, eləcə də Gənclər və İdman Nazirliyinin dəstəyi ilə İstanbul Açıq Dəniz Yelkənli Qayıq Yarış Klubu tərəfindən təşkil olunan yarışlarda 14 ölkədən 500 idmançı Çanaqqalaya doğru yola düşüb.
Dolmabahçedə Mustafa Kamal Atatürk və silahdaşlarının xatirəsinə həsr olunmuş sükut anı ilə başlayan və 3 saatdan artıq davam edən yarışlarda idmançılar külək və çətin marşrut şəraitində strategiyanın həlledici rol oynadığı mübarizə nümayiş etdiriblər. İstanbul sakinləri isə yelkənlərin 23 aprel coşqusu ilə qovuşduğu bu tədbiri sevinc hissi ilə müşahidə ediblər.
“Milli Suverenlik Kuboku” uğrunda yarışan komandalar boğaz mərhələsini tamamlayaraq Çanaqqalaya doğru yelkən açıblar.
İstanbul Açıq Dəniz Yelkənli Qayıq Yarış Klubu rəhbəri Ekrem Yemlihaoğlu hər mərhələnin özünəməxsus ruhu və hekayəsi olduğunu vurğulayaraq bildirib:
“Prezident himayəsində keçirilən 7-ci Beynəlxalq Yelkənli Qayıq Yarışları yalnız idman tədbiri deyil, eyni zamanda Türkiyənin dənizlərdəki gücünü dünyaya nümayiş etdirən nüfuz platformasıdır. Məqsədimiz bu xüsusi günlərin mənəvi dəyərini dənizlərdəki mübarizəmizlə birləşdirmək, bayrağımızı beynəlxalq sularda qürurla dalğalandırmaq və bu idman növünü gələcək nəsillərə ən peşəkar şəkildə ötürməkdir.”
Tarixə hörmət yarışı
Çanaqqala zəfərinin 111-ci ildönümü münasibətilə təşkil olunan “Tarixə hörmət” yarışında idmançılar Çanaqqalanın küləyinə qarşı mübarizə aparacaqlar.
104 dəniz mili məsafə boyunca çətin yarış keçirəcək komandalar arasında Çanaqqalaya ilk çatan heyət “Sahil Mühafizəsi Kuboku”nun sahibi olacaq.
Yarışçılar 25 apreldə Çanaqqala boğazında mübarizəni davam etdirəcəklər. Üç gün davam edəcək yarışların yekununda qalib komanda “Zəfər Kuboku”nu qazanacaq.
Qeyd edək ki, keçirilən yarışların ikinci mərhələsi 19 mayda, üçüncü mərhələsi 30 avqustda, final mərhələsi olan “Respublika Kuboku” isə 29 oktyabrda İstanbul boğazında keçiriləcək.
