Martın 5-də Çin Naxçıvana edilən dron hücumundan sonra münaqişənin daha geniş ərazilərə yayılma riski barədə xəbərdarlıq edib. Çin Xarici İşlər Nazirliyinin sözçüsü Mao Ninq jurnalistlərə açıqlamasında regionda artan gərginliyə görə narahatlığını ifadə edib. O, vurgulayıb ki, hazırda əsas prioritet hərbi əməliyyatların dərhal dayandırılması və eskalasiyanın qarşısının alınmasıdır.
Azərbaycan rəsmilərinin məlumatına görə, Naxçıvana edilən hücum nəticəsində dörd nəfər yaralanıb və mülki infrastruktura ciddi ziyan dəyib. Bildirilir ki, dronlardan biri Naxçıvan Beynəlxalq Hava Limanının terminal binasına, digəri isə Şəkərabad kəndindəki məktəbin yaxınlığına düşüb. Bu hadisə İsrail və ABŞ-ın İrana qarşı yeddi gündür davam edən genişmiqyaslı hərbi əməliyyatları fonunda gərginliyi daha da artırıb.
İran tərəfi bu hücumlar nəticəsində ölkənin ali dini lideri Əli Xamenei və yüksək vəzifəli hərbi rəsmilər də daxil olmaqla, təxminən 1000 nəfərin həlak olduğunu bildirir. Ölənlər arasında çoxsaylı məktəbli qızların da olduğu qeyd olunub. Rəsmi Tehran bu əməliyyatlara cavab olaraq İsrailə və ABŞ-ın hərbi bazalarına ev sahibliyi edən Körfəz ölkələrinə PUA və raket zərbələri endirib.
Mao Ninq həmçinin vurğulayıb ki, rəsmi Pekin beynəlxalq hüquq normalarını pozan ABŞ və İsrailin İrana qarşı hərbi əməliyyatlarına qəti şəkildə qarşıdır. Sözçü Çinin İranı öz suverenliyini, təhlükəsizliyini, ərazi bütövlüyünü və milli ləyaqətini qorumaq, eləcə də qanuni hüquq və maraqlarını müdafiə etmək məsələsində dəstəklədiyini bildirib.
Regiondakı münaqişənin enerji təchizatına yaratdığı təhdidlərə toxunan Mao Hörmüz boğazı və ətraf suların mal və enerji ticarəti üçün həyati əhəmiyyət kəsb etdiyini deyib.
O, bu bölgədə təhlükəsizlik və sabitliyin qorunmasının beynəlxalq birliyin ortaq maraqlarına tamamilə uyğun olduğunu deyib.
Mao Ninq deyib: "Çin bütün tərəfləri hərbi fəaliyyətləri dərhal dayandırmağa, gərginliyin daha da artmasının və regional xaosun qarşısını almağa, həmçinin qlobal iqtisadiyyata dəyə biləcək mənfi təsirləri minimuma endirməyə çağırır".
ABŞ və İspaniya arasındakı fikir ayrılıqlarına münasibət bildirən sözçü beynəlxalq ictimaiyyətin sülhü təşviq etmək və Yaxın Şərqdə sabitliyi bərpa etmək üçün birgə çalışmalı olduğunu vurğulayıb.
