Rəcəb Tayyib Ərdoğan G20 Zirvəsi üçün Yohannesburqda səfərdədir

Türkiyə Prezidenti Rəcəb Tayyib Ərdoğan və bir sıra ölkənin liderləri 22-23 noyabr tarixlərində Yohannesburqda keçiriləcək tarixi G20 sammiti üçün Cənubi Afrikaya səfər ediblər.

Rəcəb Tayyib Ərdoğanı OR Tambo Beynəlxalq Hava Limanında Cənubi Afrikanın məskunlaşma naziri Tembisile Simelane, Türkiyənin Cənubi Afrikadakı səfiri Kezban Nilvana Darama Yıldırımgeç və digər rəsmi şəxslər qarşılayıblar.

Dövlət başçısını həyat yoldaşı Əminə Ərdoğan, xarici işlər naziri Hakan Fidan, xəzinə və maliyyə naziri Mehmet Şimşek, Türkiyə Prezidenti Administrasiyasının İctimaiyyətlə Əlaqələr İdarəsinin rəhbəri Burhanəddin Duran, Türkiyə Prezidentinin xarici siyasət və təhlükəsizlik məsələləri üzrə müşaviri Akif Çağatay Kılıç, Ədalət və İnkişaf Partiyasının sözçüsü Ömər Çelik və digər rəsmi şəxslər müşayiət edirlər.

Rəcəb Tayyib Ərdoğan sammit çərçivəsində beş tutacaq iki sessiyada iştirak edəcək, bir neçə liderlə ikitərəfli görüşlər keçirəcək və dövlət və hökumət başçılarının şərəfinə veriləcək şam yeməyinə qatılacaq.

Sammitdə inkişaf etmiş və inkişaf etməkdə olan 18 ölkənin nümayəndə heyəti iştirak edəcək. Məlumata görə, ABŞ sammitə qatılmayacaq.

21 üzvü olan G20 inkişaf etmiş və inkişaf etməkdə olan ölkələri qlobal iqtisadi məsələləri müzakirə etmək üçün bir araya gətirməyi hədəfləyir.

Birləşmiş Millətlər Təşkilatının, Dünya Bankının və digər beynəlxalq qurumların liderləri ənənəvi olaraq zirvə görüşlərində qonaq qismində iştirak edirlər. BMT-nin Baş katibi Antonio Quterreş də zirvə görüşündə iştirak etmək üçün Yohannesburqa səfər edənlər arasındadır.