Nazirliyin sözçüsü martın 4-də Şərqi Aralıq dənizində NATO hava hücumundan müdafiə bölmələri tərəfindən İrandan atılan ballistik raketin zərərsizləşdirilməsindən sonra, Türkiyənin öz vətəndaşlarını və milli hava məkanını qorumaq əzmində olduğunu vurğulayıb.

Nazirlik Hatay vilayətinin cənubunda tapılan qalıqların raketin vurulması zamanı istifadə edilən müdafiə sisteminə aid sursat qalıqları olduğunu təsdiqləyib Hadisə zamanı hər hansı itki qeydə alınmayıb.

Nazirliyin Mətbuat və İctimaiyyətlə Əlaqələr müşaviri kontr-admiral Zeki Aktürk bu gün keçirdiyi brifinqdə bildirib ki, proseslər yaxından izlənilir və NATO müttəfiqləri ilə sıx koordinasiyada olmaqla, istənilən mənbədən gələn düşmən hərəkətlərinə cavab vermək hüququ bir daha təsdiq edilir.

Aktürk Türkiyənin regional sülh və sabitliyi prioritet hesab etdiyini qeyd edərək, Ankaranın İsrail-ABŞ birgə hücumlarını və İranın üçüncü ölkələri hədəf almasını diqqətlə izlədiyini bildirib. O, münaqişələrin dərhal dayandırılmasına ümid etdiyini və Türkiyənin problemlərin yalnız dialoq yolu ilə həlli üçün sülh səylərinə töhfə verməyə hazır olduğunu vurğulayıb.

"Türkiyə-İran sərhədində qeyri-adi bir fəaliyyət yoxdur"

Raketin havada zərərsizləşdirilməsi prosesi fevralın 28-də İsrail və ABŞ-nin İrana qarşı başlatdığı və aralarında Ali Lider Əli Xameneyinin də olduğu 900-dən çox insanın ölümü ilə nəticələnən genişmiqyaslı hücumlar fonunda baş verib.

İran bu əməliyyatlara həm İsrailin, həm də ABŞ hərbi obyektlərinə ev sahibliyi edən Körfəz ölkələrini PUA və raketlərlə hədəf almaqla cavab verib.

Gərginliyə baxmayaraq, kontr-admiral Aktürk Türkiyə-İran sərhədi boyunca hər hansı qeyri-adi fəaliyyətin müşahidə edilmədiyini bildirib.

O qeyd edib ki, yüksək texnologiyalı və çoxmərhələli müdafiə sistemləri ilə gücləndirilmiş təhlükəsizlik tədbirləri bütün sərhəd xətti boyunca tətbiq olunmaqdadır.

Nazirlik rəsmisi mülki əhalinin həyatını və regional sabitliyi təhdid edən bu toqquşmaların tezliklə sona çatmasını arzuladıqlarını ifadə edib.