Türkiyənin "Trabzonspor" futbol klubu sosial media hesablarında “Liverpul”un 34 yaşlı sabiq ulduz oyuncusu Məhəmməd Salahın təyyarədə çəkilmiş görüntülərini paylaşıb. Videoda futbolçunun əynində 61 nömrəli "Trabzonspor" forması olduğu görünür. Trabzon şəhərinin nömrə nişanı kodu olan "61" həm şəhərin, həm də klubun əsas rəmzi kimi geniş istifadə olunur.
M.Salah paylaşımda bu ifadələrə yer verib: "Trabzon, hazırsınız? Sizi eşidə bilirəm. Çox yaxında görüşəcəyik. Bizim üçün hər yər Trabzondur!"
Qeyd edək ki, "Bize her yer Trabzon" ifadəsi "Trabzonspor" klubu azarkeşlərinin ən məşhur şüarlarından biridir. Bu şüar Qara dəniz klubu ilə onun şəhərdəki və bütün Türkiyəyə yayılmış azarkeşləri arasındakı güclü əlaqəni əks etdirir.
M.Salahın İstanbulda "Trabzonspor" prezidenti Ərtoğrul Doğan ilə bir araya gəlməsi gözlənilir. Məlumata görə, o, avqustun 5-də (bu gün) klub rəhbəri ilə birlikdə Trabzona yola düşəcək.
Klub əldə olunacaq müqavilənin müddəti və maliyyə şərtləri də daxil olmaqla, hələlik təfərrüatları açıqlamayıb.
Xəbər verildiyi kimi, M.Salah İngiltərə Premyer Liqası klubu “Liverpul”da keçirdiyi doqquz ildən sonra, 2025-2026-cı illər mövsümünün sonunda "Mersisayd"lılarla yollarını ayırıb.
Misirli futbolçu "Liverpul" forması ilə çıxış etdiyi 442 matçda 257 qol vurub və 120 məhsuldar ötürmə edib. O, klubun əfsanələri olan Yan Raş və Rocer Hantdan sonra klubun bütün rəsmi yarışlarında ən çox qol vuran üçüncü oyunçusu olub. Bununla yanaşı, M.Salah "Liverpul"un Premyer Liqa tarixində ən çox qol vuran və ən çox məhsuldar ötürmə edən futbolçusu ünvanına yiyələnib.
"Enfild Road" stadionundakı çıxışı dövründə M.Salah səkkiz nüfuzlu kubok qazanıb. Bunların sırasına iki Premyer Liqa çempionluğu, UEFA Çempionlar Liqası, FİFA Klublararası Dünya Çempionatı, UEFA Superkuboku, İngiltərə Kuboku (FA Cup) və iki Liqa Kuboku daxildir.
Fərdi göstəricilərə gəldikdə isə M.Salah Premyer Liqada dört dəfə bombardir olub. O, üç dəfə Peşəkar Futbolçular Assosiasiyasının (PFA) "İlin Futbolçusu" və üç dəfə Futbol Jurnalistləri Assosiasiyasının (FWA) "İlin Futbolçusu" mükafatına layiq görülüb.
Xatırladaq ki, 2017-ci ildə "Roma"dan "Liverpul"a transfer olunmazdan əvvəl M.Salah "Bazel", "Çelsi" və "Fiorentina" klublarında da çıxış edib.
