Türkiyə Milli Müdafiə Nazirliyi (MSB) İrandan buraxılan və İraq ilə Suriya hava məkanını keçərək Türkiyə hava məkanına daxil olan ballistik raketin Şərqi Aralıq dənizindəki NATO hava və raketdən müdafiə sistemləri tərəfindən vaxtında zərərsizləşdirildiyini açıqlayıb.

Məlumata əsasən, zərərsizləşdirilən raketin qalıqları Türkiyənin Hatay şəhərinə düşüb. Hadisə nəticəsində ölən və ya yaralanan olmayıb.

Bəyanatda bu ifadələrə yer verilib: "Haradan gəlməsindən asılı olmayaraq torpaqlarımızın və vətəndaşlarımızın təhlükəsizliyini təmin etməyə qadirik. Hava məkanımızı qorumaq üçün bütün addımlar qətiyyətlə və tərəddüd etmədən atılacaq. Ölkəmizə qarşı hər hansı bir düşmən münasibətə cavab vermək hüququmuzu xatırladırıq’’.

Bütün tərəflər münaqişənin yayılmasına səbəb olacaq hərəkətlərdən çəkinməyə çağırılıb və bu mövzuda NATO və digər müttəfiqlərlə məsləhətləşmələrin davam etdiriləcəyi qeyd edilib.

Hadisə ilə bağlı xarici işlər naziri Hakan Fidan iranlı həmkarı Abbas Əraqçi ilə telefon dəlaqəsi saxlayıb.

Diplomatik mənbələrdən əldə edilən məlumata görə, telefon danışığı zamanı Hakan Fidan İrandan atıldıqdan sonra Türkiyənin hava məkanına yönəldiyi müəyyən edilən və zərərsizləşdirilən ballistik raketlə bağlı rəsmi Ankaranın reaksiyasını qarşı tərəfə çatdırıb. Bölgədəki gərginliyə diqqət çəkən Hakan Fidan münaqişənin miqyasının genişlənməsinə səbəb olacaq hər hansı hərəkətdən çəkinməyin vacibliyini vurğulayıb.