İsrailin Qəzzada “atəşi kəsməməsi” 97 fələstinlinin həyatına son qoyub

Qəzza rəsmilərinin bildirdiyinə görə, oktyabrın 10-da Qəzzada atəşkəsin qüvvəyə minməsindən sonra İsrail qüvvələri tərəfindən azı 97 fələstinli öldürülüb, 230 nəfər yaralanıb. Rəsmilər təkcə oktyabrın 19-da 21 pozuntunun qeydə alındığını bildirib.

Qəzza Hökumətinin Media Ofisindən verilən açıqlamada “İsrail işğalçı qüvvələri atəşkəsdən sonra beynəlxalq humanitar hüququ açıq şəkildə pozaraq, 80 sənədləşdirilmiş pozuntu törədib” ifadəsi işlədilib.

Bəyanatda qeyd olunub ki, pozuntular müxtəlif formalarda olub, o cümlədən mülki şəxslərə birbaşa atəş, mərmi atma, qəsdən hədəf alma, “yanğın halqaları” yaratmaq və mülki şəxslərin həbsi.

Açıqlamaya görə, İsrail qüvvələri hücumları həyata keçirmək üçün hərbi maşınlar, yaşayış məntəqələrinin kənarında yerləşən tanklar, uzaqdan hədəf alma sistemləri ilə təchiz edilmiş elektron kranlar, təyyarələr və kvadrokopter pilotsuz uçuş aparatlarından istifadə edib.

Qəzza Hökumətinin Media Ofisi bildirib: "Bu pozuntular Qəzzanın bütün valiliklərində qeydə alınıb və işğalın atəşkəs rejiminə əməl etmədiyini, xalqımıza qarşı qətl və terror siyasətini davam etdirdiyini təsdiqləyir”.

Qəzza hökuməti pozuntulara görə tamamilə İsrail qüvvələrinin məsuliyyət daşıdığını bildirib və Birləşmiş Millətlər Təşkilatını və razılaşmanın qarant tərəflərini onları dayandırmaq üçün təcili müdaxilə etməyə çağırıb.

ABŞ prezidenti Donald Trampın təklif etdiyi plan əsasında Fələstinin HƏMAS qrupu ilə İsrail arasında atəşkəs razılaşması oktyabrın 10-da qüvvəyə minib.

Müqavilə İsrail qüvvələrinin mərhələli şəkildə çıxarılmasını, qarşılıqlı əsir mübadiləsini və humanitar yardımın dərhal çatdırılmasını nəzərdə tutur.

Atəşkəs İsrailin 68 mindən çox fələstinlinin ölümünə, 170 minə yaxın insanın yaralanmasına və Qəzzanın infrastrukturunun məhvinə səbəb olan Qəzzaya qarşı iki illik müharibəsinə son qoymaq məqsədi daşıyır.