Rusiyanın xarici işlər naziri Sergey Lavrov ABŞ-ın Ukraynadakı münaqişəni gərginləşdirə biləcək hər hansı bir addım atmaqdan çəkinəcəyinə ümid etdiyini bildirib və Prezident Donald Trampın uzun müddətdir Moskva ilə birbaşa dialoqun tərəfdarı olduğunu vurğulayıb.
Rusiyanın TASS xəbər agentliyi Lavrovun İtaliyanın ‘‘Corriere della Sera’’ qəzetinə verdiyi müsahibəni yayımlayıb. Lavrov müsahibə zamanı Trampın Rusiyanın Ukrayna ilə bağlı mövqeyini tam başa düşməyə çalışdığını və davamlı dinc həll yoluna sadiq olduğunu qeyd edib.
“Biz sağlam düşüncəyə güvənirik və inanırıq ki, Vaşinqtonda bu mövqe qorunacaq və münaqişəni yeni səviyyəyə qaldıra biləcək hərəkətlərdən çəkinəcəklər,” – deyə Sergey Lavrov bildirib.
TASS-ın məlumatına görə, İtaliya qəzeti müsahibəni dərc etməkdən imtina edib.
Lavrov həmçinin bildirib ki, Tramp Rusiyanın hərəkətlərinin bir səbəblərindən birinin NATO-nun genişlənməsi və alyansın infrastrukturunun Rusiya sərhədlərinə yaxınlaşdırılması olduğunu etiraf edib.
Tramp və Putin avqust ayında Alyaskada görüşüblər. Lavrov oktyabrın 20-də ABŞ dövlət katibi Marko Rubio ilə mümkün yeni sammit barədə telefon əlaqəsi saxlayıb, lakin Tramp daha sonra həmin görüşü ləğv etdiyini açıqlayıb.
ABŞ Prezidenti qüvvələrin mövqelərində qalması şərtilə Ukraynada dərhal atəşkəs çağırışlarını dəstəkləyib, lakin rәsmi Moskva Kiyevin ərazi iddialarından imtina etməli olduğunu bildirib.
Lavrov Avropa hökumətlərini sülh səylərini pozmaqda günahlandırıb. O, Avropanın “bütün sülh təşəbbüslərini sabotaj etdiyini və Moskva ilə birbaşa təmasdan imtina etdiyini” söyləyib. Lavrov bildirib ki, Rusiya “rusofob isteriya’’ bitdikdən sonra Avropa ilə yenidən əlaqə qurmağa hazır olacaq.
Bu arada, Avropa liderləri Rusiyanı Avropa demokratiyalarına qarşı “hibrid müharibə” aparmaqda ittiham edirlər. Ukraynanı dəstəkləyən Aİ ölkələri isə sanksiyaların 19-cu paketi barədə razılığa gəlib və Kiyevə əlavə maliyyə dəstəyi vermək üçün borc və ya dondurulmuş Rusiya aktivlərindən istifadə barədə müzakirələr aparırlar.
