İran atəşkəsdən sonra hava məkanını və hava limanlarını yenidən uçuşlara açdı.

Dövlət mediasının məlumatına görə, İran ötən ay İsraillə yaşanan qarşıdurmalar səbəbilə bağladığı hava məkanını yenidən uçuşlara açıb.

İranın rəsmi İRNA xəbər agentliyi bildirib ki, Tehranın Mehrabad və İmam Xomeyni beynəlxalq hava limanları, eləcə də ölkənin şimal, şərq, qərb və cənub bölgələrində yerləşən digər hava limanları fəaliyyətlərini bərpa edib.

Rəsmilərin açıqlamasına əsasən, uçuşlar səhər saat 05:00-dan axşam 18:00-a qədər həyata keçiriləcək.

“Tasnim” xəbər agentliyi isə qeyd edib ki, İranın hava məkanı artıq gündüz saatlarında beynəlxalq tranzit uçuşlar üçün də açıqdır.

Xatırladaq ki, İran iyunun 13-də İsraillə gərginliyin artması səbəbilə hava məkanını tamamilə bağlamışdı.

İyunun 24-də qüvvəyə minən atəşkəs razılaşmasından sonra İran hava məkanını tədricən açmağa başlayıb və xüsusilə şərq bölgələri üzərində beynəlxalq uçuşlar üçün çıxışı genişləndirib.

Qlobal aviasiya xəritəsi illər sonra ilk dəfə olaraq ciddi və bahalı dəyişikliklərə məruz qalıb.

Aviaşirkətlər uçuş marşrutlarını dəyişdirmək məcburiyyətində qalıblar ki, bu da səyahət müddətinin uzanmasına və əməliyyat xərclərinin artmasına səbəb olub.

Beynəlxalq aviaşirkətlərin əksəriyyəti bölgədə artan hərbi gərginlik və davam edən raket sınaqları səbəbindən Yaxın Şərqin geniş hava məkanından yan keçməyə üstünlük verirlər.