Nobel Sülh Mükafatı laureatı Maria Korina Maçado Osloda keçirilən mərasimində iştirak etməyib. Bu barədə məlumat Nobel İnstitutunun rəsmi açıqlamasında təsdiqlənib.

İnstitutun sözçüsü Erik Aşeim tədbirdən əvvəl AFP-yə verdiyi müsahibədə deyib: “O, mərasimə qatılmayacaq’’.

58 yaşlı Maçado 2024-cü ilin avqust ayından bəri gizlənərək yaşayır və Venesuela hakimiyyətinin xəbərdarlıqlarına baxmayaraq səyahət planlarını gizli saxlayır.

Venesuelanın baş prokuroru Tarek Vilyam Saab ötən ay bildirib ki, Maria Korina Maçado Norveçə səyahət edərsə onu “qaçaq” hesab edəcəklər.

Müxalifət lideri Venesuelada olarkən, anası, üç bacısı və qızı da daxil olmaqla bir neçə qohumu Oslodakı mükafatlandırma mərasimində iştirak edib.

Mərasim, ABŞ-ın son həftələrdə Karib dənizinə qoşun yeritdiyi və narkotik qaçaqmalçılığı ilə əlaqələndirilən gəmilərə hücum etdiyi dövrə təsadüf edib.

Bəzi tənqidçilər Maçadonu ABŞ prezidenti Donald Trampla birləşdiyinə görə tənqid ediblər.

Venesuela prezidenti Nikolas Maduro isə deyir ki, Maçadonun haqlı hesab etdiyi ABŞ əməliyyatlarının əsl məqsədi onun hökumətini devirmək və Venesuelanın neft ehtiyatlarını ələ keçirməkdir.