Trampın təhlükəsizliklə bağlı tənqidlərindən sonra Fransa Qrenlandiyada hərbi təlim keçirəcək
Tramp bildirib ki, Danimarka Qrenlandiyanı Çin və Rusiyadan müdafiə edə bilməz
Fransa Danimarka və bir sıra digər Avropa ölkələri ilə birgə "soyuq hava" təlimində iştirak etmək üçün Qrenlandiyaya qoşun göndərəcəyini açıqlasa da, ABŞ prezidenti Donald Tramp Qrenlandiyanı Rusiya və Çindən qorumaq üçün Danimarkaya etibar edə bilməyəcəyini bildirib.
"Le Monde" qəzetinin verdiyi məlumata görə, Fransa Silahlı Qüvvələr Nazirliyi dağ döyüş bölmələrinin missiyada iştirak edəcəyini bildirib. Qoşun sayı və mandatlarla bağlı təfərrüatlar bu gün (15 yanvar 2026) prezident Emmanuel Makronun Fransanın cənubundakı İstres hava bazasında silahlı qüvvələrə illik müraciəti zamanı açıqlanacaq.
Danimarka daha əvvəl "bu gündən tutmuş təlim fəaliyyətləri ilə bağlı hərbi imkanlar və qoşunlar yerləşdirməklə Qrenlandiyadakı hərbi mövcudluğunu gücləndirəcəyini" açıqlamışdı.
İsveç də bölgəyə zabitlər göndərdiyini və bu hərbi təlimdə iştirak etdiyini açıqlamışdı.
Almaniya həmçinin digər Avropa tərəfdaşları ilə birlikdə Danimarkanı dəstəkləmək üçün "kəşfiyyat missiyası" çərçivəsində yanvarın 15-dən 17-nə qədər Qrenlandiyaya qoşun göndərəcəyini açıqlamışdı.
Tramp iddia edir ki, Danimarka Rusiya və Çinə qarşı dura bilməz
ABŞ prezidenti Donald Tramp iddia edir ki, Qrenlandiya Rusiya və Çindən gələn təhdidlərə qarşı durmaq üçün ABŞ-ın nəzarəti altında olmalıdır.
Tramp Ağ Evdə jurnalistlərə deyib: "Danimarkanın özünü müdafiə etməsinə güvənə bilmərəm. Onlar bu barədə danışırdılar, ora əlavə xizək komandası yerləşdirdilər. Keçən ay ikinci xizək komandası göndərdilər, amma bunun xeyri olmayacaq. Milli təhlükəsizlik üçün Qrenlandiyaya ehtiyacımız var, görəcəyik nə olacaq. Əgər biz müdaxilə etməsək, Rusiya müdaxilə edəcək, Çin müdaxilə edəcək. Danimarka bu barədə heç nə edə bilməz, amma biz hər şeyi edə bilərik".
Bu açıqlamalar Ağ Evdə ABŞ vitse-prezidenti Cey Di Vens, dövlət katibi Marko Rubio, Danimarka xarici işlər naziri Lars Lokke Rasmussen və Qrenlandiyanın xarici işlər naziri Vivian Motzfeldt arasında keçirilən görüşdən sonra verilib.
Görüşdən sonra keçirilən mətbuat konfransında Rasmussen deyib: “Amerikanın mövqeyini dəyişə bilmədik. ABŞ prezidentinin Qrenlandiyanı fəth etmək istəyi olduğu aydındır. Biz bunun krallığın (Danimarkanın) maraqlarına uyğun olmadığını çox, çox açıq şəkildə bildirdik”.
Rasmussen həmçinin qeyd edib ki, Danimarka və ABŞ həll yolu tapmaq üçün yüksək səviyyəli işçi qrupu yaratmaq barədə razılığa gəliblər.