Çin qlobal gəmiqayırma sənayesində lider mövqeyini qoruyur

Fevralın 2-də açıqlanan rəsmi statistikaya əsasən, Çin 2025-ci ildə həm ümumi istehsal həcmi, həm də sifariş portfelinin payına görə dünyanın lider gəmi istehsalçısı statusunu qoruyub saxlayıb.

Çin Sənaye və İnformasiya Texnologiyaları Nazirliyinin məlumatına görə, ölkənin gəmi istehsalı ötən il 11,4% artaraq 53,69 milyon dedveyt tona (DWT) çatıb. Bu göstərici ilə Çinin gəmiqayırma sektoru qlobal istehsalın 56%-ni təkbaşına təmin edib.

Ölkənin sifariş portfelində də rekord göstəricilər qeydə alınıb. Belə ki, gözlənilən sifarişlərin ümumi həcmi 274,42 milyon DWT təşkil edərək qlobal bazarın 66,8%-nə bərabər olub. İl ərzində qəbul edilən yeni sifarişlər isə 107,82 milyon DWT həcmində olmaqla, qlobal yeni sifarişlərin 69%-ni təşkil edib.

Bu nəticələrlə Çin ardıcıl olaraq 16-cı ildir ki, qlobal gəmiqayırma sənayesində dünya lideri mövqeyini əldən vermir.