Hələb Səhiyyə İdarəsinin bildirdiyinə görə, dekabrın 22-də Suriyanın şimalında, Hələb şəhəri ərazisində Suriya Demokratik Qüvvələrinin (SDQ) törətdiyi hücum nəticəsində ölənlərin sayı 5 nəfərə çatıb.
Hələb Səhiyyə İdarəsinin Media Ofisinin bir rəsmisi dövlət televiziyası “Əl-İxbariyyə” TV-yə açıqlamasında şəhərin yaşayış məntəqələrini hədəf alan hücum zamanı 9 nəfərin də yaralandığını bildirib.
Məlumata görə, SDQ silahlıları dekabrın 22-də gecə saatlarında bir nəzarət-buraxılış məntəqəsini, eləcə də “Ər-Razi” Xəstəxanasını pulemyot və minaatanla atəşə tutub.
Suriya Müdafiə Nazirliyi hücumdan sonra qruplaşmanın bir neçə üzvünün zərərsizləşdirildiyini açıqlayıb.
Qeyd edək ki, SDQ terror təşkilatı PKK-nın Suriyadakı qolu olan YPG-nin nəzarəti altında fəaliyyət göstərir.
Xatırladaq ki, Suriya Prezident Administrasiyası martın 10-da SDQ-nin dövlət qurumlarına inteqrasiyası ilə bağlı bir razılaşmanın imzalandığını elan etmişdi. Həmin açıqlamada ölkənin ərazi bütövlüyünün bir daha təsdiqləndiyi, istənilən bölünmə cəhdinin isə qəti şəkildə rədd edildiyi vurğulanmışdı.
Suriya rəsmiləri bildirirlər ki, həmin tarixdən bəri SDQ razılaşmanın şərtlərini yerinə yetirmək istiqamətində heç bir real addım atmayıb.
Suriya hökuməti isə ötən ilin dekabrında 24 il hakimiyyətdə olan Bəşər Əsəd rejiminin devrilməsindən sonra ölkədə təhlükəsizliyin təmin olunması istiqamətində səylərini daha da gücləndirib.
