Türkiyə Prezidenti Rəcəb Tayyib Ərdoğan Cənubi Afrikanın Yohannesburq şəhərində keçirilən G20 sammitində ölkə başçılarına müraciət edərək bildirib ki, Türkiyə gələn ilin noyabr ayında Birləşmiş Millətlər Təşkilatının iqlim dəyişikliyi üzrə konfransı olan COP31-ə ev sahibliyi etməyə hazırdır.

Qeyd edək ki, Avstraliya öz namizədliyini geri çəkdikdən sonra Türkiyə COP31 iqlim konfransını gələn il Aralıq dənizi sahilində yerləşən Antalya şəhərində keçirməyə hazırlaşır.

Prezident R.T.Ərdoğan noyabrın 22-də etdiyi çıxışında Türkiyənin enerji hədəflərini vurğulayaraq bildirib ki, ölkə 2035-ci ilə qədər günəş və külək enerjisi gücünü dörd dəfə artırmağı planlaşdırır. O, əlavə edib ki, bu il yenilənə bilən enerjinin Türkiyənin enerji istehsalı strukturundakı payı artıq 60 faizi ötüb.

Dövlət başçısı R.T.Ərdoğan Qəzza məsələsinə də toxunaraq bildirib ki, ötən ay əldə edilmiş atəşkəs qlobal sabitlik üçün həyati əhəmiyyət kəsb edir.

Prezident deyib: “Birləşmiş Millətlər Təşkilatının məlumatlarına görə, İsrailin səbəb olduğu dağıntı Fələstinin inkişaf səylərini 70 il geri salıb”.

R.T.Ərdoğan əlavə edib ki, Türkiyə davamlı atəşkəsi dəstəkləməyə və Fələstin bölgəsinin yenidən qurulmasına töhfə verməyə qətiyyətlə hazırdır. “Hər zaman olduğu kimi, Fələstin xalqının yanında olmağa qətiyyətli və hazırıq”, - deyə ölkə başçısı bildirib.

Xatırladaq ki, Cənubi Afrikanın Yohannesburq şəhəri dünyanın ən təcili problemlərinin müzakirə olunduğu iki günlük liderlər sammitinə ev sahibliyi edir.