Qazaxıstan Prezidenti Kasım-Jomart Tokayev Avropada Adi Silahlı Qüvvələr haqqında Müqavilənin (AASQM) ölkə üzrə fəaliyyətinin dayandırılması barədə qərar imzalayıb.
AASQM 1990-cı ilin noyabrında Parisdə NATO ölkələri ilə keçmiş Varşava Müqaviləsi üzvləri arasında imzalanıb.
Müqavilə Atlantik okeanından Ural dağlarına qədər uzanan Avropa bölgəsində döyüş tanklarının, zirehli döyüş maşınlarının, 100 mm və daha böyük kalibrli artilleriya sistemlərinin, döyüş təyyarələrinin və hücum helikopterlərinin sayına məhdudiyyətlər tətbiq edirdi.
Sənədin yenilənmiş versiyası 1999-cu ildə İstanbulda keçirilən ATƏT Zirvə Görüşündə təqdim edilib.
Lakin yenilənmiş mətni yalnız Rusiya, Belarus, Qazaxıstan və Ukrayna ratifikasiya edib. Rusiya isə 2007-ci ildə müqavilənin öz ərazisində qüvvəsini dayandırmaq barədə qərar qəbul edib.
