ABŞ prezidenti Tramp İrana qarşı yeni hərbi əməliyyat başlatmaq, yoxsa maliyyə sanksiyalarının Tehranı danışıqlar masasına gətirib-gətirməyəcəyini gözləmək variantları arasında qərarsız qalıb.
"Axios" ABŞ rəsmilərinə istinadən xəbər verir ki, ABŞ ilə İran arasındakı çıxılmaz vəziyyətin yaxın gələcəkdə həll olunacağına dair hər hansı işarə yoxdur. Xəbərə görə, münaqişə maliyyə sanksiyaları, dəniz blokadası tətbiqləri və görüşlərin keçirilib-keçirilməyəcəyi ilə bağlı bazarlıqlarla birlikdə "Soyuq müharibəyə bənzər bir mərhələyə" daxil olub.
Qeyd olunur ki, rəsmilər ABŞ-nin müharibəsiz və razılaşmasız "donmuş bir münaqişəyə" çəkilməsindən narahatdırlar. Bu vəziyyətdə Vaşinqton öz qüvvələrini aylarla bölgədə saxlamaq məcburiyyətində qalacaq.
Aprelin 27-də yayılan xəbərdə vurğulanır ki, əgər bu ssenari reallaşarsa, Hörmüz boğazı bağlı qalacaq, ABŞ blokadası davam edəcək və hər iki tərəf digərinin "geri addım atmasını və ya ilk atəşi açan tərəf olmasını" gözləməyə davam edəcək.
ABŞ prezidenti Donald Trampın yeni hərbi hücumlar başladıb-başlatmayacağı, yoxsa "maksimum təzyiq" şəklində tətbiq olunan maliyyə sanksiyalarının İranı danışıqlar masasına gətirməsini gözləyəcəyi mövzusunda tərəddüd etdiyi bildirilir.
Noyabr ayındakı ara seçkilərə altı ay qalmış, Trampa yaxın bir rəsmi "Axios"a verdiyi açıqlamada "Donmuş bir münaqişə Tramp üçün siyasi və iqtisadi cəhətdən ən pis şeydir" deyib.
Həmin rəsmi əlavə edib: "Prezident məyus olmuş, lakin realist görünür. Güc tətbiq etmək istəmir, amma geri addım da atmır".
Digər tərəfdən, Qətər ABŞ və İran arasında sülh sazişi danışıqlarının çıxılmaz vəziyyətə girməsi ilə əlaqədar Körfəzdə "donmuş münaqişə" ehtimalına qarşı xəbərdarlıq edib.
Qətər Xarici İşlər Nazirliyinin sözçüsü Məcid əl-Ənsari mətbuat konfransında bildirib: "Bölgədə yaxın vaxtlarda yenidən müharibəyə qayıdılmasını istəmirik; eyni zamanda, hər siyasi fürsətdə yenidən alovlanan donmuş münaqişə prosesinə də girmək istəmirik".
"Axios"un məlumatına görə, Trampın bəzi yüksək rütbəli məsləhətçiləri ABŞ-nin Hörmüz boğazı blokadasını hələlik davam etdirməyi və daha çox bombardman həyata keçirməyə qərar verməzdən əvvəl İrana qarşı iqtisadi sanksiyaları artırmağı tövsiyə edirlər.
Tramp aprelin 27-də İranın təqdim etdiyi təklifi öz milli təhlükəsizlik komandası ilə müzakirə edib. İran ABŞ-nin İran gəmilərinə tətbiq etdiyi blokadanı ləğv edəcəyi təqdirdə Hörmüz boğazının yenidən açılması mövzusunda danışıqlara hazır olduğunu təklif edib.
Hesabata görə, hələlik heç bir qərar qəbul edilməyib. Trampın təklifi qəbul etməsi ehtimalı az görünür; çünki bu addım, İrana hücumun "əsas səbəbi" kimi göstərilən nüvə proqramının ləğvi ilə bağlı danışıqlara xələl gətirə bilər.
