Amerika Birləşmiş Ştatlarının (ABŞ) prezidenti Donald Tramp bildirib ki, müttəfiqlər İran tərəfindən faktiki olaraq bağlanmış kritik neft daşıma marşrutu olan Hürmüz boğazının açılmasına kömək etməsələr, NATO "çox pis" bir gələcəklə qarşılaşacaq.

Martın 15-də “Financial Times” qəzetinə verdiyi qısa müsahibədə Tramp ABŞ-nin Rusiya ilə müharibədə Ukraynaya kömək etdiyi kimi, bağlanması ilə dünya miqyasında enerji qiymətlərinin artmasına səbəb olan Hörmüz boğazı məsələsində də Avropanın kömək etməsini gözlədiyini dilə gətirib.

İllər boyu alyansı ABŞ-nin səxavətindən yararlanmaqda ittiham edən Tramp: “Heç bir cavab olmasa və ya cavab mənfi olsa, bunun NATO-nun gələcəyi üçün çox pis olacağını düşünürəm. Boğazdan istifadə edənlərin orada pis bir şeyin baş verməsinin qarşısını almaq üçün kömək etmələri son dərəcə yerinə düşərdi”, -deyə bildirib.

Gözlədiyi xüsusi yardımla bağlı suala cavab olaraq Tramp minatəmizləyən gəmilərlə yanaşı, İran sahili boyunca yerləşən bəzi pis aktorları zərərsizləşdirəcək şəxslər” istədiyini qeyd edib.

İran ilə danışıqlar

Tramp Hörmüz boğazının təhlükəsizliyinin təmin edilməsi məsələsində yeddi ölkə ilə danışıqlar apardığını ifadə edərkən, həmçinin Vaşinqtonun İranla təmasda olduğunu, lakin Tehranın münaqişəni dayandırmaq üçün ciddi danışıqlara hazır olduğundan şübhə duyduğunu bildirib.

Tramp “Air Force One” təyyarəsində jurnalistlərə administrasiyasının İranla danışdığını, lakin hazır olduqlarını zənn etmədiyini deyib.

İrana qarşı aparılan müharibənin nə qədər davam edəcəyi ilə bağlı qeyri-müəyyənlik son iki həftədə tədarük riskləri səbəbindən xam neft qiymətlərinin sürətlə artdığı neft bazarlarını sarsıdıb.