Türkiyə Respublikasının xarici işlər naziri Hakan Fidan Qəzza İdarəetməsi üzrə Milli Komitənin (NCAG) sədri Əli Şaas ilə görüş keçirib. Bu barədə Türkiyə Xarici İşlər Nazirliyi məlumat yayıb.
Bildirilib ki, Türkiyə dövləti mühasirədə olan bölgənin sabitliyinin təmin edilməsi və yenidən qurulması məqsədilə diplomatik dəstək və humanitar yardım göstərir.
NCAG fevralın 14-də yaydığı açıqlamada bildirib ki, Qəzza rəhbərliyinin bütün dövlət qurumlarını təhvil verməyə hazır olması ilə bağlı bəyanatları keçid dövrünün idarə olunması prosesində komitənin məsuliyyətlərini tam şəkildə üzərinə götürməsi üçün zəmin yaradır.
Komitənin açıqlamasında deyilir: “Nizamlı keçid prosesinə dair son dövrlərdə ifadə edilən hazır olma bəyanatını Qəzzanın müvəqqəti idarəçiliyi kimi vəzifəsini yerinə yetirməsində həlledici addım kimi qiymətləndiririk.”
Bundan əlavə, Qəzza mətbuat ofisi fevralın 12-də milli komitənin öz vəzifələrinin icrasına başlaması ilə bağlı çağırışını yeniləyib. “Həmas” müqavimət hərəkatı da komitənin fəaliyyətini asanlaşdırmağa hazır olduğunu dəfələrlə bəyan edib.
Bildirilir ki, komitə üzvlərinin Qəzzaya daxil olması İsrailin nəzarətində olan sərhəd-keçid məntəqələri vasitəsilə sahə və təhlükəsizlik koordinasiyasını tələb edir. Girişin gecikməsi ilə bağlı komitə tərəfindən hələlik rəsmi açıqlama verilməyib, İsrail isə məsələ ilə bağlı mövqe bildirməyib.
Xatırladaq ki, ötən ilin oktyabrında əldə olunan atəşkəsdən sonra yaradılan Qəzza İdarəetməsi üzrə Milli Komitə (NCAG) Qəzzanın mülki idarəçiliyinə və yenidən qurulmasına nəzarət etmək məqsədilə həyata keçirilən sülh səyləri çərçivəsində formalaşdırılmış Fələstin idarəetmə orqanıdır.
Əməliyyat müstəqilliyi axtarışı
Komitənin yaydığı bəyanatda qeyd olunur: “Qəzzada səmərəli və müstəqil fəaliyyət göstərməsinin təmin edilməsi bərpa və yenidənqurma üçün beynəlxalq dəstəyin qarşısındakı maneələri aradan qaldıracaq, İsrailin tam şəkildə geri çəkilməsini təmin edəcək və normal gündəlik həyatın bərpasına imkan yaradacaq.”
Komitə həmçinin vasitəçilərə və əlaqəli bütün tərəflərə gözləyən məsələlərin gecikmədən həlli üçün səylərin gücləndirilməsi çağırışı edərək bildirib: “Fələstin xalqının daha artıq vaxt itirməyə dözümü yoxdur. Etibarlı və problemsiz keçidin təmin olunması üçün indi hərəkətə keçmək lazımdır.”
Qeyd edək ki, ötən il oktyabrın 10-da əldə edilən atəşkəs İsrailin Qəzzaya qarşı iki il davam edən müharibəsini dayandırıb. Lakin hücumların azalmasına və məhdud humanitar yardımın daxil olmasına baxmayaraq, atəşkəs pozuntuları davam edir.
Fələstin rəsmiləri 72 min nəfərdən çox insanın həlak olduğunu, 171 mindən çox şəxsin yaralandığını və mülki infrastrukturun 90 faizinin məhv edildiyini bildirirlər. Birləşmiş Millətlər Təşkilatı isə yenidənqurma xərclərini təxminən 70 milyard ABŞ dolları həcmində qiymətləndirir.
Qəzza Səhiyyə Nazirliyi atəşkəs qüvvəyə mindikdən sonra azı 591 fələstinlinin həlak olduğunu və 1.578 nəfərin yaralandığını açıqlayıb.
