Türkiyə İsrailin Suriyanın cənubundakı hərbi infrastrukturu hədəf alan hücumunu pisləyərək bu addımı bölgədə vəziyyəti gərginləşdirən təhlükəli addım kimi qiymətləndirib.
Türkiyə Xarici İşlər Nazirliyinin martın 20-də yaydığı bəyanatda hücumun beynəlxalq hüquq normalarına zidd olduğu, Suriyanın suverenliyi və ərazi bütövlüyünü sarsıtdığı vurğulanıb. Nazirlik beynəlxalq ictimaiyyəti İsrailin hücumlarının qarşısını almaq üçün məsuliyyət daşımağa çağırıb və 1974-cü il tarixli Qüvvələrin Ayırılması haqqında Sazişin müddəalarına əməl olunmasının vacibliyini diqqətə çatdırıb.
Bəyanatda həmçinin qeyd olunub ki, Türkiyə Suriyada davamlı sabitliyin təmin edilməsi üçün Suriya xalqı ilə həmrəyliyini bundan sonra da davam etdirəcək.
Xatırladaq ki, İsrail ordusu daha əvvəl Suriyanın cənubunda Dəməşq administrasiyasına məxsus hərbi bazaları, komandanlıq mərkəzlərini və silah anbarlarını vurduğunu açıqlamışdı. Suriya Xarici İşlər Nazirliyi də öz növbəsində hərbi obyektlərə edilən bu hücumu pisləyən bəyanat yayıb.
