Böyük Britaniya İsrail hökumətinin işğal altındakı İordan çayının qərb sahilində 19 yeni qeyri-qanuni yaşayış məntəqəsinin tikintisini təsdiqləməsini pisləyib.

Böyük Britaniyanın Yaxın Şərq məsələləri üzrə naziri Hamiş Falkoner internet səhifəsində etdiyi paylaşımda bu ifadələrə yer verib. “Birləşmiş Krallıq İsrail hökumətinin Fələstin ərazilərində 19 yeni yaşayış məntəqəsinin tikintisini təsdiqləməsini qətiyyətlə pisləyir. Bu addımlar beynəlxalq hüquqa ziddir”.

Falkoner vurğulayıb ki, bu qərar sülh prosesinə zərər vura və iki dövlətli həll yolu ilə əldə edilə biləcək uzunmüddətli sülh və təhlükəsizlik perspektivlərini təhlükə altına qoya bilər.

Fələstin rəsmilərinin məlumatına görə, 2023-cü ilin oktyabr ayından bu yana İsrail qüvvələri və qeyri-qanuni köçkünlər tərəfindən azı 1102 fələstinli öldürülüb, təxminən 11 min nəfər yaralanıb və 21 minə yaxın insan həbs edilib.

Keçən ilin iyul ayında Beynəlxalq Ədalət Məhkəməsi İsrailin Fələstin ərazilərini işğal etməsini qanunsuz hesab edib və işğal olunmuş İordan çayının qərb sahili ilə Şərqi Qüdsdəki bütün yaşayış məntəqələrinin boşaldılması ilə əlaqədar çağırış edib.

İsrailin maliyyə naziri Bezalel Smotriç işğal altındakı Şərqi Qüdsdə yeni qanunsuz yaşayış məntəqəsinin tikintisini təsdiqləyib. Smotriç “X” sosial şəbəkəsində yaydığı açıqlamada bildirib ki, bu yaşayış məntəqəsi “Qüdsü şərqdən qorumaq üçün strateji baza” rolunu oynayacaq.