İrandakı səhiyyə infrastrukturu İsrail və ABŞ-nin hücumları zamanı əhəmiyyətli dərəcədə zərər görüb. Ümumdünya Səhiyyə Təşkilatı (ÜST) bir çox xəstəxana, personal və müalicə prosesinə təsir edən hadisələri təsdiqləyib.

ÜST-nin rəhbəri bu gün səhər saatlarında bildirib ki, ABŞ və İsrailin ölkəyə yönəlik hücumları zamanı İranda martın əvvəlindən bu yana səhiyyə xidmətlərinə 20-dən çox hücum reallaşıb.

Təşkilatın Baş direktoru Tedros Adhanom Qebreyesus sosial media platforması "X"-də etdiyi paylaşımda 1 martdan bəri İranda səhiyyə xidmətlərinə qarşı 20-dən çox hücumun təsdiqləndiyini bildirib. Hücumlar nəticəsində azı doqquz nəfərin həyatını itirdiyini qeyd edən Qebreyesus ölənlər arasında bir yoluxucu xəstəliklər mütəxəssisi və İran Qırmızı Aypara Cəmiyyəti üzvünün də olduğunu qeyd edib.

Qebreyesus son günlərdə Tehranda “Pasteur” institutu, "Delaram Sina" psixi sağlamlıq xəstəxanası və "Tofigh Daru" əczaçılıq müəssisəsinə qarşı çoxsaylı hücumların qeydə alındığını bildirib.

Baş direktor əlavə edib: "İrandakı və bölgədəki münaqişə səhiyyə xidmətlərinin göstərilməsinə, eləcə də tibb işçilərinin, xəstələrin və səhiyyə müəssisələrində olan mülki şəxslərin təhlükəsizliyinə təsir edir. Sülh ən yaxşı dərmandır".

İran hökumətinin məlumatına görə, aprelin 2-də baş verən digər bir ABŞ-İsrail hücumu anesteziya və xərçəng əleyhinə dərmanlar istehsal edən İranın ən böyük əczaçılıq şirkətlərindən biri olan "Tofigh Daru"nu vurub. Tedros Qebreyesus həmçinin "Delaram Sina" psixi sağlamlıq xəstəxanasının martın 29-da ciddi zərər gördüyünü qeyd edib.

Müharibənin ilk günlərində Tehranın şimal-qərbindəki lüks xüsusi “Gandhi" xəstəxanasının şüşələri sındırılıb; ÜST-nin Tehran ofisi də həftənin əvvəlində zərər görüb.

Ölkəni "Daş dövrünə" qaytarmaq hədəsi

ABŞ prezidenti Donald Tramp beynəlxalq hüququn mülki infrastrukturun hədəf alınmasını qadağan etməsinə baxmayaraq, İranı "Daş dövrünə qaytarmaqla" hədələyib.

Səhiyyə müəssisələri İkinci Dünya Müharibəsindən sonra dünya güclərinin müharibə qaydaları kimi qəbul etdiyi Cenevrə Konvensiyalarına əsasən qorunan ərazilərdir.

İran Qırmızı Aypara Cəmiyyətinin son məlumatlarına görə, müharibədə 307 səhiyyə, tibbi və təcili yardım müəssisəsi zərər görüb.

İsrail 2023-cü ilin oktyabrından başlayaraq bölgəyə yönəlik iki illik bombardmanları zamanı Qəzzadakı xəstəxanalara dəfələrlə hücum etmişdi; rəsmilər bu xəstəxanaların Fələstin müqavimət qrupu HƏMAS-ın silahlıları tərəfindən istifadə edildiyini iddia etmişdilər.

ABŞ və İsrail İranın nüvə silahı inkişaf etdirmə yolunda sürətlə irəlilədiyini iddia edərək 28 fevralda ölkəyə hücum ediblər. Tehran isə bu iddiaları rədd edib.