Fransa prezidenti Emmanuel Makron Cənubi Koreyaya səfəri zamanı jurnalistlərə müsahibəsində ABŞ prezidenti Donald Trampın müttəfiqlərə ünvanladığı "Hörmüz boğazını yenidən açmaq" çağırışına münasibət bildirib. Makron boğazın hərbi yolla açılması ideyasını real hesab etmədiyini və rəsmi Parisin belə bir hərbi əməliyyat seçimini dəstəkləmədiyini vurğulayıb. Emmanuel Makron qeyd edib ki, güc tətbiqi həm uzunmüddətli prosesdir, həm də ərazidən keçən gəmiləri İran İnqilab Keşikçiləri Korpusu və ballistik raketlərin birbaşa hədəfinə çevirir.

Emmanuel Macron bildirib ki, boğazda sərbəst naviqasiyanın bərpası üçün Avropa və digər tərəfdaşlarla koalisiya yaratmağa çalışır. Lakin o vurğulayıb ki, bu məqsədə yalnız rəsmi Tehranla dialoq və məsləhətləşmələr yolu ilə nail olmaq mümkündür. E.Makron boğazın qlobal enerji və ticarət üçün strateji əhəmiyyətini vurğulayaraq bildirib ki, problemin həlli üçün yeganə real yol diplomatiyadır.

Donald Trampın NATO müttəfiqlərini tənqid etməsi və ABŞ-ni alyansdan çıxarmaq hədələrinə də toxunan E.Makron Vaşinqtonun İsraillə birgə başladığı əməliyyatlara görə müttəfiqləri günahlandırmasını əsassız adlandırıb.

“Amerikalıların öz qərarları ilə həyata keçirdikləri bir əməliyyata görə dəstək almadıqlarından şikayət etmələri başadüşülən deyil. Bu, onların əməliyyatıdır, bizim yox. Bizim əsas məqsədimiz isə mümkün qədər tez sülhə nail olmaqdır’’,-deyə E.Makron qeyd edib.

Emmanuel Makron Donald Trampın həm onun, həm də xanımı Bricit Makronun ünvanına səsləndirdiyi kinayəli ifadələrə də cavab verib. Bu cür çıxışları "nə zərif, nə də etikaya uyğun" adlandıran Fransa prezidenti Trampın sözlərinin cavaba layiq olmadığını vurğulayıb.