Suriya dövlət xəbər agentliyi bildirib ki, Suriya “yaxında” iki ölkə arasında 400 kilovoltluq elektrik ötürücü xətti ilə Türkiyədən elektrik enerjisi idxalına dair müqavilə imzalayacaq.
Xəbər agentliyi ölkənin enerji naziri Məhəmməd əl-Bəşirə istinadən xəbər verib ki, Suriya Türkiyə ilə sərhəddə yerləşən Kilis şəhərini Suriyanın şimalındakı Hələb şəhəri ilə birləşdirən təbii qaz kəmərinin tikintisi üzərində də işləyir.
“Boru kəməri Suriyadakı elektrik stansiyalarına gündə 6 milyon kubmetr qaz tədarükünü təmin edəcək ki, bu da ölkənin enerji vəziyyətinin yaxşılaşmasına töhfə verəcək”, - deyə əl-Bəşir bildirib.
Türkiyənin Suriyaya uzun müddətdir verdiyi dəstəyi tərifləyən suriyalı nazir Türkiyənin Suriyanın şimalını elektrik enerjisi ilə təmin etmək üçün son vaxtlar göstərdiyi səyləri vurğulayıb.
Nazir Türkiyənin Reyhanlı ilə Suriyanın Harem bölgəsi arasında yeni elektrik xəttinin çəkilişi üçün hazırlıqların davam etdiyini və tender prosesi başa çatdıqdan sonra təxminən 80 meqavatlıq elektrik enerjisinin Suriyanın şimalına çatdırılacağını bildirib.
Xarici investisiya axtarışı
Əl-Bəşir mayın 3-də həmçinin deyib ki, Suriya kəşfiyyatdan tutmuş mədən işlərinə qədər öz enerji sektorunda xarici investisiyalar axtarır və türk şirkətlərinin ölkənin müharibədən sonrakı bərpasında iştirakını alqışlayır. Suriya enerji sektorunun bütün sahələrinə investisiya üçün açıqdır. Bura neft-qaz sektorunda kəşfiyyat, qazma, emal və ötürmə imkanları, o cümlədən elektrik xətlərinin və qurğularının bərpası, neft emalı zavodlarının yenidən qurulması və mədən işlərinin aparılması daxildir.
Dəniz qazının kəşfiyyatında əməkdaşlıq
Suriyanın neft və təbii qaz sektorunda bir sıra investisiya layihələri həyata keçirməyə hazırlaşdığını qeyd edən Əl-Bəşir fosfat və lityuma diqqət yetirərək ölkənin mədənçıxarma sektorunu inkişaf etdirmək planlarını da vurğulayıb.
Danışıqlar zamanı Əl-Bəşir Türkiyənin enerji və təbii sərvətlər naziri Alparslan Bayraktarın dənizdə təbii qaz kəşfiyyatı ilə bağlı çağırışını xatırladaraq, iki ölkənin enerji sahəsində daha geniş əməkdaşlıq üçün çərçivə sazişi imzalayacağını bildirib.
Suriyanın enerji infrastrukturu on ildən çox davam edən vətəndaş müharibəsi nəticəsində dağıdılıb, neft obyektləri, elektrik stansiyaları və elektrik ötürücü xətləri ciddi şəkildə zədələnib.
Qeyd edək ki, vaxtilə Şərqi Aralıq dənizinin ən böyük neft və qaz istehsalçılarından biri olan Suriyanın hasilatı azalmaqdadır.
ABŞ Energetika Nazirliyinin məlumatına görə, neft hasilatı gündəlik 383 min bareldən, təbii qaz hasilatı isə 316 milyon kub futdan bu səviyyələrdən xeyli aşağı düşüb.
İxracın dayandırılması ilə hökumətin mühüm gəlir mənbəyi ciddi miqdarda azalıb. Türkiyə 2017-ci ildən bəri Suriyanın şimalındakı bölgələri elektrik və yanacaqla təmin edir.
