Ukrayna Prezidenti Volodimir Zelenski Türkiyə Prezidenti Rəcəb Tayyib Ərdoğan ilə təhlükəsizlik məsələlərini müzakirə etmək üçün İstanbula səfər edib. Ukrayna ölkə başçısı bildirib ki, səfər çərçivəsində keçiriləcək görüşlər insanların həyatının qorunmasına, sabitliyin möhkəmləndirilməsinə və Avropa ilə Yaxın Şərqdə təhlükəsizliyin artırılmasına yönələcək. O, həmçinin Türkiyə ilə əməkdaşlığın gücləndirilməsinin hədəfləndiyini qeyd edib.
V.Zelenski görüşdən əvvəl verdiyi açıqlamada keçiriləcək danışıqların əsas diqqət mərkəzində insanların qorunması, regional sabitliyin gücləndirilməsi və təhlükəsizlik məsələləri olacağını bildirib.
Qeyd edək ki, sözü gedən səfər Prezident R.T.Ərdoğanın bir gün əvvəl Rusiya Prezidenti Vladimir Putin ilə keçirdiyi görüşdən sonra baş tutub. V.Putin rəsmi Kiyevi Rusiya ilə Türkiyə arasında uzanan və Avropaya qaz nəql edən boru kəmərini hədəf almağa cəhd etməkdə ittiham edib.
Bildirilir ki, tərəflər arasında görüş İstanbulda Dolmabağça Sarayında baş tutur. Bu saray daha əvvəl Rusiya və Ukrayna arasında keçirilən danışıqlara da ev sahibliyi edib.
Atəşkəs axtarışı
V.Zelenskinin səfər çərçivəsində pravoslav dünyasının ruhani liderlərindən olan Fənər Rum Patriarxı Bartolomeos ilə də görüşəcəyi gözlənilir. Səfər Ukrayna və Rusiyada 12 aprel tarixində qeyd olunacaq pravoslav Pasxası ərəfəsinə təsadüf edir.
Kiyev rəhbərliyi Pasxa dövründə enerji infrastrukturuna hücumların dayandırılmasını nəzərdə tutan müvəqqəti atəşkəs üçün çağırış edib. Rusiya isə qısamüddətli atəşkəsə müsbət yanaşmadığını bildirərək rəsmi Kiyevdən konkret təklif almadığını açıqlayıb.
Dörd ildən artıqdır davam edən müharibə şəraitində Ukrayna Rusiyanın hərbi potensialını zəiflətmək məqsədilə enerji infrastrukturunu hədəf alır. Rusiyanın Ukraynadakı enerji obyektlərinə hücumları isə milyonlarla insanın elektrik və istilik xidmətlərinə çıxışını məhdudlaşdırıb.
